İspaniyanın “Sevilya” klubu əsas komandanın baş məşqçisi Xavyer Qarsiya Pimienta ilə əməkdaşlıq müddətini uzadıb.
Arena.az bu barədə La Liqa təmsilçisinin rəsmi saytına istinadən məlumat verir.
Yenilənmiş müqavilə 2027-ci ilin iyun ayının sonuna qədər qüvvədə olacaq.
Baş məşqçi ilə müqavilə müddətinin uzadılması barədə, sentyabrın 24-də İspaniya La Liqasının 7-ci turunda “Valyadolid”lə ev oyununda qazanılmış 2:1 hesablı qələbədən sonra “Sevilya”nın prezidenti Xose Mariya del Nido Karrasko məlumat verib.
Qarsiya Pimienta Əndəlüs komandasının sükanı arxasına 2024-cü ilin iyul ayının 1-də təyin edlib. İspan mütəxəssisin qarşısına ötən mövsümdən bəri tənəzzül yaşayan komandanı dirçəltmək tapşırığı qoyulub.
50 yaşlı ispan mütəxəssis “Sevilya”nı 7 oyuna çıxarıb, 2 qələbə, 2 heç-heçə, 3 məğlubiyyət yaşayıb, topların fərqi isə 7:9 nisbətindədir.
Qarsiya Pimienta məşqçilk karyerasına 2006-cı ildə “Barselona”da başlayıb. 2021-ci ilə qədər Kataloniya klubunun sistemində çalışmış Pimienta “blauqrana”nın “B” komandasında işləyib, həmçinin yeniyetmələrdən ibarət komandanın baş məşqçisi olub. 2022-2024-cü illərdə Pimienta “Las-Palmas”ı çalışdırıb.
Qarsiya Pimientanın qənimətlər muzeyində “Barselona” ilə qazandığı UEFA Yeniyetmələr Liqası (2017/2018) kuboku var.
Pimientanın komandası İspaniya La Liqasının cari mövsümündə 7 turdan sonra 8 xalla yarış cədvəlinin 12-ci pilləsində qərarlaşıb.
