Azərbaycanda, Bakı Kristal Zalında təşkil olunmuş taekvondo üzrə sayca 26-cı dünya çempionatına bu gün yekun vurulub.
Arena.az xəbər verir ki, yarışın son günündə 2 çəki dərəcəsində qaliblər bəlli olub.
Qadın taekvondoçular arasında 53 kq-da dünya çempionu tituluna Nahid Kiyaniçande (İran) yiyələnib. Gümüş medala Ju Zio (Çin), bürünc mükafatlara Şad Sami Elhossein (Misir) və Tatyana Minina (Dünya Taekvondosu) sahib olub.
Kişi taekvondoçular arasında +87 kq çəki dərəcəsinin ən güclüsü Şeyk Sallah Sisse (Fil Dişi Sahili) olub. O, finalda Karlos Sansoresi (Meksika) məğlub edib. 3-cü yerləri Emre Ateşli (Türkiyə) və Pasko Boziç (Xorvatiya) tutublar.
Azərbaycan taekvondoçularından Həmidrza Bədriəliabadi (+87 kq) ilə Səmərrux Osmanova (53 kq) da mundialı medalsız başa vurublar. Həmidrza çempionata qələbə ilə başlayıb. O, 1/16 finalda Nouhum Diavaranı (Mali) 2:1 hesabı ilə məğlub edib. Taekvondoçumuz ikinci qarşılaşmasında fransalı Omar El Yazidini yensə də, 1/4 finalda türkiyəli rəqibi ilə bacarmayıb. Səmərrux isə 1/16 finalda Mariella Bou Habib (Livan) ilə üz-üzə gəlib. 1:2 hesabı ilə uduzan təmsilçimiz yarışla erkən vidalaşıb.
Əvvəlki günlərdə millimizin digər üzvlərindən Səyyad Dadaşov (54 kq), Qaşım Maqomedov (58 kq), Xanoğlan Kərimov (63 kq), Cavad Ağayev (68 kq), Eltac Qafarov (74 kq), Əliəskər Əliyev (80 kq) və Taleh Süleymanov (87 kq) da medalsız qalmışdı. Qadınların yarışında isə Minayə Əkbərova (46 kq), Patimat Abakarova (49 kq), Fatimə Məcidova (62 kq) və Fəridə Əzizova (67 kq) uğursuz çıxışı ilə diqqət mərkəzinə düşmüşdü.
Millimiz üçün “Ən yaxşı döyüşçü ruhu”
Beləliklə, mayın 29-da start götürən və 145 ölkədən 949 idmançının qatıldığı mundialda 16 dəst medal öz sahibini tapıb. Dünya Taekvondosunun 50 illiyinə və Ümummilli Lider Heydər Əliyevin 100 illiyinə təsadüf edən yarışda qızıl medal qazanan idmançılar aktivinə 140 reytinq xalı əlavə ediblər.
Kişi taekvondoçuların komanda hesabında ilk “beşliy”i Cənubi Koreya, Xorvatiya, Türkiyə, İtaliya və Fil Dişi Sahili tutub. Qadınların mübarizəsində Türkiyə, Fransa, Xorvatiya, Macarıstan və İran fərqlənib. Azərbaycan millisi isə Dünya Taekvondosu tərəfindən “Ən yaxşı döyüşçü ruhu” nominasiyasında fərqlənib.
Mundialın yekununda Azərbaycan Taekvondo Federasiyasının vitse-prezidenti Nağı Səfərov dünya çempionatının keçici bayrağını növbəti yarışa ev sahibliyi edəcək Çin Taekvondo Federasiyasının rəsmisinə təqdim edib.
Dünya çempionatı Rusiyadan sonra MDB ölkələri arasında ikinci dəfə Azərbaycanda baş tutub. Ölkəmiz mundialı qəbul edən Avropa ölkələri arasında Almaniya, Danimarka, İspaniya, Yunanıstan, Rusiya və Böyük Britaniyadan sonra yeddinci kimi tarixə düşüb.