“Mançester Yunayted”in baş məşqçisi Erik ten Haq Premyer Liqanın 4-cü turunda “Sauthemton” üzərində səfər qələbəsini (3:0) şərh edib.
Arena.az “Mançester Yunayted”in mətbuat xidmətinə istinadən, niderlandlı mütəxəssisin oyun barədə fikrini təqdim edir:
“İlk 20 dəqiqə bizim üçün çətin idi, amma belə oyunlarda belə də olur. Andre Onana penaltini dəf etdikdən dərhal sonra isə De Liqt qol vurdu, oyun tamamilə bizim idi və o andan etibarən oyunda üstünlüyü ələ keçirdik.
Düşünürəm ki, daha əvvəl qol vurmalı idik, fürsətlərimiz də oldu, oyuna da nəzarət edirdik. Üçüncü qolu erkən vurmaq üçün də bir neçə yaxşı fürsətimiz vardı”, deyə Ten Haq vurğulayıb.
4 turdan sonra “Mançester Yunayted” Premyer Liqanın yarış cədvəlində 6 xalla 10-cu pillədə qərarlaşıb. Xalsız “Sauthempton” isə axırıncıdan əvvəlki, 19-cu pillədədir. Premyer Liqaya 12 xalla “Mançester Siti” başçılıq edir.
