Türkiyə Futbol Federasiyası (TFF) bu ölkənin liqalarında çıxış edən 1024 peşəkar futbolçu barədə danışılmış oyunlarla əlaqədar intizam işi açıb.
Arena.az bu barədə qurumun mətbuat xidmətinə məlumat verir.
Belə ki, TFF, araşdırma nəticəsində mərc oyunlarında iştirakı müəyyən edilmiş 1024 oyunçunun adını açıqlayıb. Qurum bununla bağlı siyahını Peşəkar Futbol İntizam Şurasına (PFDK) göndərib.
1024 oyunçudan 27-si Super Liqa klublarında çıxış edənlərdir. Artıq həmin futbolçuların adları da məlumdur:
“Qalatasaray”: Eren Elmalı, Metehan Baltacı
“Beşiktaş”: Ersin Destanoğlu, Necip Uysal
“Trabzonspor”: Boran Başkan, Salih Malkoçoğlu
“Alanyaspor”: Enes Keskin, Yusuf Özdemir, Bedirhan Özyurt, İzzet Çelik
“Rizəspor”: Efe Doğan, Furkan Orak
“Qaziantep”: Nazım Sanqare, Muhammet Taha Güneş
“Antalyaspor”: Kerem Kayaarası
“Göztəpə”: İzzet Furkan Malak, Uğur Kaan Yıldız
“Kasımpaşa”: Ege Albayrak, Ali Emre Yanar.
“Samsunspor”: Celil Yüksel
“Kayserispor”: Abdulsamet Burak, Berkan Aslan.
“Konyaspor”: Adil Demirbağ, Alassane Ndao
“Eyüpspor”: Mükremin Arda Türköz
“Karagümrük”: Furkan Bekleviç, Kerem Yusuf Sirkeci
TFF rəsmi qurumlarla yazışmağa davam edir və cavablara əsasən araşdırmanı genişləndirəcək.
Federasiya aşağı liqalarda araşdırmalara cəlb olunmuş futbolçuların çoxluğunu nəzərə alaraq, 2-ci və 3-cü Liqaların oyunlarını 2 həftəlik təxirə salıb.
Super Liqa klubunun prezidenti saxlanıldı
TFF ilə yanaşı, hüquq-mühafizə orqanları da qardaş ölkə futbolundakı mərc qalmaqalı ilə bağlı araşdırma aparır. Belə ki, Türkiyədə 600-ə yaxın futbolçu matçlarda mərc işi ilə bağlı polisə dindirilməyə çağırılıb. Məlumata görə, futbolçular, məşqçilər və menecerlər Albaniya, Bolqarıstan və tanınmamış Şimali Kiprdə fəaliyyət göstərən qeyri-leqal saytlarda mərc ediblər.
Super Liqada mübarizə aparan “Eyüpspor” klubunun prezidenti Murat Özkaya da saxlanılıb. Onun da adı danışılmış oyunlarda və mərc qalmaqalında hallanır.
Xatırladaq ki, daha əvvəl TFF prezidenti İbrahim Hacıosmanoğlu bildirib ki, İntizam Komitəsi futbol matçlarına mərc etdiklərinə görə 149 hakimi vəzifəsindən kənarlaşdırıb. Türkiyə prokurorluğu 21 nəfərin, o cümlədən 17 hakimin və ölkənin aparıcı futbol klublarından birinin prezidentinin həbsinə dair order verib. İstanbul Baş Prokurorluğunun məlumatına görə, bu şəhərdə və digər 11 vilayətdə koordinasiyalı səhər reydləri zamanı adları açıqlanmayan azı 18 şübhəli saxlanılıb.
