“Real”ın əfsanəsi, keçmiş alman yarımmüdafiəçi Toni Kroos “qaymaqlılar”ın heyətinə əla əlavə ola biləcək futbolçu tövsiyə edib.
Arena.az “Madrid Xtra” dərgisinin “Bild” nəşrinə istinadı əsasında, Kroosun müvafiq tövsiyəsini təqdim edir:
“Florian Virts “Real”da? O, istənilən komandaya, o cümlədən “Real”a uyğunlaşa bilər. Onun keyfiyyətləri ilə, mən hesab edirəm ki, bu, əla bir sövdə olardı”, deyə Toni Kroos vurğulayıb.
Hücumameyilli yarımmüdafiəçi Florian Virts 2020-ci ilin iyul ayından “Bayer”in əsas komandasında çıxış edir. Buna qədər gənc yarımmüdafiəçi “Brauvayler”, “Köln” və “Bayer”in yeniyetmələrdən və gənclərdən ibarət komandalarında çıxış edib.
Virtsin Leverkuzen təmsilçisi ilə müqaviləsinin müddəti 2027-ci ilin iyun ayının sonuna qədər qüvvədədir.
Virts cari mövsümdə “əczaçılar”ın heyətində bütün yarışlarda 25 oyuna çıxıb, 12 qol vurub, 8 məhsuldar ötürmə verib.
Virtsin “Bayer”in heyətində çıxışının ümumi mənzərəsi 177 oyun, 53 qol, 58 məhsuldar ötürmədən ibarətdir.
Florian Virts “Bayer”lə Almaniya Bundesliqasının (2023/2024), Almaniya Kubokunun (2023/2024) və Almaniya Super Kubokunun (2024/2025) qalibi olub. Uğurlu çıxışı sayəsində Virts Almaniya Bundesliqasında 2023/2024-cü illər mövsümünün ən yaxşı oyunçusu seçilib.
Florian Virts 2021-ci ilin sentyabr ayında debüt etdiyi Almaniya yığmasının heyətində 29 oyuna çıxıb, 6 qol və 7 məhsuldar ötürmə ilə fərqlənib. Florian Almaniyanın U-21 yığması ilə 2021-ci il Avropa çempionatının qalibi olub.
“Transfermarkt” internet-portalı 21 yaşlı alman hücumameyilli yarımmüdafiəçinin transfer dəyərini 140 milyon avro məbləğində qiymətləndirir.
