TÜRKİYƏ

Türkiyə futbolu: Futbol Türkiyədə də ən populyar idman növüdür. Modern futbolu bu ölkədə 19-cu əsrin sonlarında oynamağa başlayıblar. Həmin dövrlərdə yaranan komandalar da, onların üzvü olan futbolçular da daha çox müsəlman olmayan şəxslər idi.

Türkiyənin ən məşhur klubları sayılan “Qalatasaray” 1907-ci, “Fənərbaxça” 1907-ci ildə yaradılıb. “Beşiktaş” klubu 1903-cü ildə qurulsa da, onun futbol bölməsi 1910-cu ildən fəaliyyətə başlayıb. Məhz bu klubların yaranması ilə müsəlman və türk futbolçuların da sayı artmağa başlayıb.

Türkiyə Futbol Federasiyası (TFF) isə 1923-cü ildə qurulub. Elə həmin ildə TFF FİFA-ya üzv qəbul olunub, Türkiyə milli komandası isə ilk rəsmi matçında İstanbulda Rumıniya yığması ilə qarşılaşıb.

1924-cü ildə Türkiyədə ilk dəfə ölkə miqyasında bir futbol çempionatı təşkil olunub. 2001-ci ildən Super Liqa adı verilən Türkiyə çempionatının tarixi isə 1924-dən yox, 1959-cu ildən hesablanır. Çünki məhz həmin ildən etibarən Türkiyədə peşəkar futbol çempionatı təşkil olunmağa başlayıb.

Türkiyənin ən çox çempion olan komandası “Qalatasaray”dır. Bu baxımdan “sarı-qırmızılar”ın əsas izləyiciləri digər İstanbul təmsilçiləri “Fənərbaxça” ilə “Beşiktaş”dır. Bu komandalarla yanaşı çempionluq sevinci yaşayan digər üç komanda “Trabzonspor”, “Bursaspor” və “Başakşəhər”dir.

Türkiyə millisi tarixində üç dəfə (1950, 1954, 2002) dünya çempionatına vəsiqə qazanıb. Lakin maliyyə çətinlikləri ilə əlaqədar olaraq, DÇ-1950-də iştirakdan imtina ediblər. “Ay-ulduzlular”ın ən ciddi uğurlarından biri də DÇ-2002-yə təsadüf edir. Sözügedən komanda Şenol Günəşin rəhbərliyi ilə mundialda üçüncü yeri tutub. Bir il sonra bu komanda FİFA Konfederasiyalar Kubokunda da bürünc medalla kifayətlənib.

Milli komanda Avropa çempionatında 1996-cı ildən çıxış etməyə başlayıb. “Ay-ulduzlular” 2008-ci ildə Avstriya və İsveçrədə keçirilən qitə birinciliyində üçüncü yeri tutub. AÇ-1996, AÇ-2000, AÇ-2016-da isə uğur qazanmaq mümkün olmayıb.

Milli formanı ən çox (120 dəfə) Rüştü Reçber geyinib. Ən çox (51) qol vuran futbolçu isə Hakan Şükürdür.