İsveçrəli futbol hakimi Sandro Şerer UEFA Super Kubokunun “Real” və “Atalanta” arasında keçiriləcək oyununu idarə edəcək.
Arena.az bu barədə UEFA-nın mətbuat xidmətinə istinadən məlumat verir.
36 yaşlı Şerer Almaniyada keçirilmiş 2024-cü il Avropa çempionatında çalışıb. Şerer 2015-ci ildən FIFA referisidir.
Xatırladaq ki, “Real” UEFA Super Kubokunda iştirak hüququnu ötən mövsüm Çempionlar Liqasının qalibi olmaqla, “Atalanta” isə ötən mövsün Avropa Liqasının qalibi olmaqla əldə edib.
2023/2024-cü illər mövsümünün Çempionlar Liqası və Avropa Liqasının qalibləri arasında UEFA Super Kuboku uğrunda oyun Polşanın paytaxtı Varşavanın “Milli” stadionunda keçiriləcək. Oyun avqustun 14-də baş tutacaq.
Xatırladaq ki, 1973-cü ildə təsis edilmiş UEFA Super Kubokunun ilk qalibi Niderland nəhəngi Amsterdam “Ayaks”ı olub. Kubokun cari sahibi isə “Mançester Siti”dir.
Vurğulayaq ki, “Barselona”, “Real” və “Milan” hər biri 5 dəfə qalibi olmaqla, UEFA Super Kubokunu ən çox qazanmış klublardır. Göründüyü kimi, “kral klubu” qalib olacağı halda mütləq rekord müəyyənləşdirəcək.
