Premyer Liqa təmsilçisi “Kəpəz”in mərkəz yarımmüdafiəçisi Valdemar Almeyda Gəncə klubunun mətbuat xidmətinə açıqlama verib.
Arena.az xəbər verir ki, anqolalı futbolçu Premyer Liqanın 14-cü turu çərçivəsində qarşılaşacaqları “Araz-Naxçıvan”la matçda uğurlu nəticəyə kökləndiklərini bildirib:
“İki həftədir ki, bu oyuna hazırlaşırıq. Məşqlər yaxşı gedir. Çempionatda yaranan fasilədən maksimum şəkildə yararlanmağa çalışdıq. Məqsədimiz bəllidir – bütün qarşılaşmalara xal üçün çıxırıq. Bu günlər ərzində də məşq planımız hesabımıza üç xal əlavə etmək üzərində qurulub. Oyuna hazırlaşmaq üçün milli komandaların oyunları səbəbindən kifayət qədər vaxtımız olub. Diqqətimizi məşqlərə cəmləmişik. Fasilədən yaxşı yararlanmalıyıq”.
“Pana” ləqəbli oyunçu qış fasiləsinə qədər komandanın daha çox xal toplamağı qarşısına məqsəd qoyduğunu deyib: “Məşqlərdə və oyunlarda gördüyümüz işi davam etdirməliyik. Belə olan halda qələbələr təbii olaraq gələcək. Çünki futbolda möcüzə yoxdur, əgər yaxşı işləyirsənsə, deməli, nəticəsi olacaq. Bir müddət əziyyət çəkə bilərsən, amma bunun qarşılığında bəhrəsi həmişə görünəcək. Biz daha çox qol vurmaq istəyirik. Sonuncu yerdən kənarda qış fasiləsinə yollanmaq möhtəşəm olacaq”.
Valdemar Almeyda açıqlamasında öz oyunu barədə danışmaq istəmədiyini qeyd edib. O, işinə kənardakıların qiymət verməsini istəyib:
“Oyunum haqqında danışmağı çox sevmirəm, başqalarının danışmasına üstünlük verirəm. Kluba və həmkarlarıma çox yaxşı uyğunlaşıram. Bu, meydançada işləri asanlaşdırır, özümdən müsbət enerji ötürməyə çalışıram. Təcrübəmi, biliklərimi komandanın oyununun, nəticəsinin yaxşılaşması üçün ortaya qoyuram. Azərbaycan futbolunun tarixi xüsusiyyətini özündə cəmləyən, əynimdə daşıdığım köynəyi daha da şərəfləndirmək üçün var gücümlə çalışacağam”.
