Türkiyənin “Fənərbaxça” klubu ilkin razılıq əldə etdiyi və İstanbula gətirdiyi braziliyalı yarımmüdafiəçi Villian Arao ilə müqavilə bağlayıb. Arena.az xəbər verir ki, bu barədə İstanbul təmsilçisinin rəsmi saytı məlumat yayıb.
Tərəflər 2+1 illik müqaviləyə imza atıblar. İstanbul klubunun Braziliya “Flamenqo”sundan transfer edilmiş futbolçuya görə nə qədər təzminat ödədiyi açıqlanmır. Məşhur “Transfermarkt” saytı isə bu keçidin 3 milyon avroya başa gəldiyini yazıb.
“Korintians”ın yetirməsi olan Villian Arao “Portuqeza”, “Şapekoense”, “Atletiko Qoiyaniense” və “Botafoqo”da da icarədə oynayıb. Dayaq yarımmüdafiəçisi mövqeyində çıxış edən futbolçu, 2016-cı ildən “Flamenqo”da çıxış edirdi. 30 yaşlı futbolçu bu komandanın heyətində 330 oyuna 29 qol vurub. Arao Braziliya millisində də 1 oyuna çıxıb.
“Fənərbaxça” öz yetirməsi olan Arda Okan Kurtulanı da “Adana Dəmirspor”a satdığını açıqlayıb. 19 yaşlı futbolçu yeni klubu ilə 3+1 illik müqaviləyə imza atıb. İstanbul təmsilçisinin əsas komandasında cəmi 1 oyun keçirmiş yarımmüdafiəçi, Türkiyədə doğulmasına baxmayaraq, Şimali Makedoniyanın U-19 və U-21 yığmalarında oynayıb.
Yeri gəlmişkən, “Adana Dəmirspor” “Qalatasaray”dan da Ali Yavuz Kolu transfer edib. 21 yaşlı forvardla 2+2 illik müqavilə imzalanıb. “Qalatasaray”ın öz yetirməsi olan futbolçu, əvvəlki mövsümlərdə “Tarsus İdman Yurdu”, “Dənizlispor” və “Keçiörengücü”də icarədə oynayıb. Ali Yavuz Türkiyənin U-14, U-15, U-16, U-17, U-18 və U-19 yığmalarında da oynayıb.
