Almaniya yığmasının baş məşqçisi Yulian Nagelsman “bundestim”in sükanı arxasında gələcəyi ilə bağlı sualı cavablayıb.
Arena.az “Sport1” dərgisinə istinadən, alman mütəxəssisin bu barədə fikrini təqdim edir:
“İşləməyə başlayanda müəyyən bir inam yaranır. Biz Avropa çempionatını yaxşı keçirdik və futbol baxımından çoxuna nail olduq. 2026-cı ildən sonra əməkdaşlığa davam edib-etməyəcəyimizi hələ bilmirəm, amma bu mövqedə özümü çox rahat hiss edirəm”, deyə Nagelsman vurğulayıb.
Xatırladaq ki, Yulian Nagelsman Almaniya yığmasının sükanı arxasına 2023-cü ilin sentyabrında təyin edilib. Bu müddətdə gənc mütəxəssis “bundestim”i 16 oyuna çıxarıb, 9 qələbə sevinci yaşayıb, 4 heç-heçə edib və 3 məğlubiyyətə üzülüb. Nagelsmanın rəhbərliyi altında Almaniya yığmasının top fərqi isə 33:17 nisbətindədir.
Almaniya Futbol İttifaqı Yulian Nagelsmanla müqavilənin müddətini uzatmaq istəyir. Bu barədə yığmanın idman direktoru Rudi Föller açıqlama verib:
“Biz Nagelsmanı inandırmağa çalışacağıq ki, o, daha bir neçə il komandada qalmalıdır”, – deyə funksioner bildirib.
Nagelsmanın hazırkı sözləşməsinin müddəti 2026-cı ilin yayında başa çatacaq.
Nagelsman karyerasının əvvəlində “Bayern”, “Leypsiq” və “Hoffenhaym”ı çalışdırıb.
