Alman mütəxəssis Yurgen Klopp Çempionlar Liqasının final oyununu Dortmund “Borussiya”sının rəhbərliyi ilə birlikdə izləmək dəvəti alıb.
Arena.az “Footmercato” dərgisinə istinadən məlumat verir ki, “Borussiya”nın baş direktoru Hans-Yoahim Vatske komandanın keçmiş baş məşqçisi Yurgen Klopu Çempionlar Liqasının finalını onunla birlikdə izləməyə dəvət edib.
Klopun bu dəvəti qəbul edib-etmədiyi və bu oyunda stadionda iştirak edib-etməyəcəyi barədə məlumat verilmir.
Yurgen Klopp 2008-ci il iyulun 1-dən 2015-ci il iyunun 30-dək “Borussiya”nı çalışdırıb. Bu müddət ərzində Klopun rəhbərliyi altında 319 oyun keçirmiş “Borussiya” 181 qələbə qazanıb, 65 heç-heçə edib və 73 məğlubiyyət alıb. Klopp Dortmund klubuna Almaniya Bundesliqasında (2 dəfə), Almaniya Kubokunda və Almaniya Super Kubokunda (2 dəfə) qalibiyyətlər qazandırıb.
Xatırladaq ki, “Borussiya” sonuncu dəfə Çempionlar Liqasının finalında 2013-cü ildə Klopun rəhbərliyi altında oynayıb. Həmin oyunda Almaniya nəhəngi “Bayern”ə 1:2 hesabı ilə məğlub olub.
