Futbol üzrə Azərbaycan Premyer Liqasında mövsümü 8-ci pillədə baş tutan “Kəpəz” sol cinah müdafiəçisi Yusif Nəbiyev ilə yollarını ayırıb.
Arena.az xəbər verir ki, 25 yaşlı futbolçu bu barədə özü “İnstagram” səhifəsində paylaşım edib.
O, “Hər şeyə görə çox sağ ol, “Kəpəz” yazaraq, komandası ilə vidalaşıb.
Xatırladaq ki, Yusif Nəbiyev 2022-ci ilin iyul ayında “Sumqayıt”dan ayrılaraq “Kəpəz”lə 1 mövsümlük müqavilə bağlamışdı. Artıq onun bu klubla müqaviləsinin müddəti bu ayın sonunda başa çatacaq. Bu üzdən də futbolçu azad agent kimi istənilən klubla müqavilə bağlaya biləcək. Nəbiyevin karyerasını “Səbail”də davam etdirməsi gözlənilir.
Yusif geridə qalan mövsümdə Gəncə təmsilçisinin heyətində 37 oyuna çıxıb. O, bu görüşlərdə 2 qol vurub, 2 məhsuldar ötürmə müəllifi olub.
Müdafiəçi əvvəllər “Sumqayıt” (59 oyun, 4 qol, 4 assist), “Qəbələ” (36 oyun, 2 qol, 2 assist) və “Zirə”də (8 oyun) də forma geyinib. O, Azərbaycanın U-17, U-19 və U-21 yığmalarında da oynayıb.
