Bu yay Fransanın “Lill” klubundan ayrılan Türkiyə milli komandasının hücumameyilli yarımmüdafiəçisi Yusuf Yazıcı “Olimpiakos”a keçib.
Arena.az xəbər verir ki, bu barədə Yunanıstan klubunun rəsmi saytına istinadən xəbər verir.
27 yaşlı futbolçu yeni klubuna azad agent kimi qoşulub və 3 illik (2027-ci ilin 30 iyununa qədər) müqavilə bağlayıb.
Xatırladaq ki, Yusuf Yazıcı “Lill”in düşərgəsinə 2019-cu ilin avqustunda 18,5 milyon avro qarşılığında yetirməsi olduğu “Trabzonspor”dan keçmişdi. Bu müddətdə Yazıcı 2022-ci ilin yanvarından iyununa qədər Moskva CSKA-sında icarədə olub. O, həmçinin bir müddət icarə əsasında “Trabzonspor”a da qayıbıb və 2023-cü ilin iyununda yenidən “Lill”ə qoşulub.
2023/2024 mövsümündə Yazıcı “itlər”in heyətində 42 oyuna çıxıb, 12 qol vurub, 4 məhsuldar ötürmə verib. Yusufun “Lill”in heyətində ümumi statistikası isə belədir: 135 oyun, 29 qol, 15 məhsuldar ötürmə.
Türk futbolçu “Lill”in 2020/2021 mövsümündə Fransa çempionluğunu qazanmasında oyunu ilə müstəsna xidmətlər göstərib. Yazıcı həmçinin 2021/2022 mövsümündə Fransa Super Kubokunu qazanıb. Yusuf 7 qolla Avropa Liqasının 2020/2021 mövsümünün ən sərrast futbolçusu olub.
Yusuf Yazıcı 2017-ci ilin iyununda debüt etdiyi Türkiyə millisinin heyətində 45 oyuna 3 qol, 7 məhsuldar ötürmə ilə fərqlənib.
“Transfermarkt” internet portalı 27 yaşlı Yusuf Yazıcını 10 milyon avro məbləğində qiymətləndirir.
Yeri gəlmişkən, Avropa Liqasının Liqa mərhələsində Azərbaycan çempionu “Qarabağ”ın rəqiblərindən olan “Olimpiakos”un bu yay yollarını ayırdığı monteneqrolu hücumçu Stevan Yovetiç də Kiprin “Omoniya” klubuna keçib. 34 yaşlı forvard Nikosiya təmsilçisi ilə 2 illik sözləşməyə imza atıb.
“Olimpiakos”a 2023-cü ilin sentyabrında qoşulmuş Yovetiç bu komandada 34 oyuna 8 qol vurub, 4 assistlə yadda qalıb. O, daha öncə “Fiorentina”, “Monako”, “Partizan”, “Mançester Siti”, “Herta”, “İnter” və “Sevilya” kimi klublarda da çıxış edib.
Stevan Yivetiç 2007-ci ilin martından çıxış etdiyi Monteneqro yığmasında 80 oyun keçirib, 36 qol və 18 assistlə yadda qalıb.
“Transfermarkt” internet portalı 34 yaşlı Yovetiçi 700 min avro məbləğində qiymətləndirir.
