“Yuventus” şokda! 15 xalı silindi, 7 pillə gerilədi!

İtaliyanın ən titullu futbol klublarından olan “Yuventus” yenə tarixinin ən pis günlərini yaşamaqdadır. Arena.az xəbər verir ki, İtaliya Futbol FederasiyasıA Seriyası rəhbərliyi Turin klubunu ağır cəzalandırıb.

Belə ki, komandanın hesabından bu mövsüm A Seriyasında topladığı xalların 15-i silinib. Bu barədə sözügedən qurumlar rəsmi saytları vasitəsilə məlumat yayıblar. Cəzaya Turin klubunun fəaliyyətində yol verdiyi maliyyə pozuntuları səbəb göstərilib. Nəticədə klub turnir cədvəlində 3-cü pillədən 10-cu sıraya enib. Bu günə qədər 37 xalla 3-cü sırada qərarlaşan komanda hazırda 22 xalla 10-cudur.

Eyni zamanda klub rəhbərliyində yer almış bu şəxslər də uzun müddətli diskvalifikasiyaya məruz qalıblar:

Fabio Paratiçi – 2.5 illik
Andre Anyelli – 2 illik
Mauritsio Arrivabene – 2 illik
Federiko Kerubini – 1.4 illik
Pavel Nedved – 8 aylıq

Xatırladaq ki, daha öncə İtaliya Futbol Federasiyasının prokurorluğu maliyyə fırıldaqlarına görə “Yuventus”un ölkə çempionatında 9 xalının silinməsini tələb etmişdi. Lakin görünür məsələ araşdırıldıqdan sonra kluba daha ağır cəza verilməsinə ehtiyac duyulub. Turin təmsilçisinin qərardan appelyasiya şikayəti verib-verməyəcəyi bilinmir.

“Yuventus”da prezident Andre Anyelli, vitse-prezident Pavel Nedved, klubun İcraiyyə Komitəsinin rəhbəri Mauritsio Arrivabene və bütün idarə heyəti 2022-ci il noyabrın 28-də istefa vermişdi. Nəticədə “Exor Holding” klubun prezidenti postuna mühasib olan Canluka Ferreronu təyin etmişdi.

Baş verənlərlə əlaqədar UEFA da klub haqqında araşdırmalara başladığını açıqlayıb.