“İnter Mayami”nin hücumçusu Lionel Messi klublararası dünya çempionatının Amerika Birləşmiş Ştatlarında keçirilməsinə şərh verib.
Arena.az məlumat verir ki, argentinalı hücumçu bu barədə “Apple Music”ə müsahibəsi zamanı söhbət açıb:
“Mən düşünürəm ki, “İnter Mayami” üçün dünya çempionatında ilk dəfə çıxış etmək çox vacibdir. Yarış Amerika Birləşmiş Ştatlarında keçəcək, MLS üçün isə iki komanda ilə təmsil edilmək – bu, əntiqədir. Bütün bunlar MLS üçün bir futbol liqası olaraq böyüyüb tərəqqi etməyə davam imkanı yaradır. Futbolçular bura gələ və tərəqqi edə bilərlər”, deyə “Leo” vurğulayıb.
Xatırladaq ki, FIFA Klub Dünya Kubokunun 2025-ci il iyunun 15-dən iyulun 13-dək Amerika Birləşmiş Ştatlarında keçirilməsi nəzərdə tutulub. Klublararası dünya çempionatı tarixdə ilk dəfə 32 iştirakçı və fərqli tərtibatda keçiriləcək.
Lionel Messi 2000-2021-ci illərdə “Barselona”nın düşərgəsində olub, kiçik bir oğlandan görkəmli oyunçuya qədər uzun bir futbol yolu keçib, çoxsaylı komanda və fərdi qənimətləri qazanıb.
Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
“Leo” yeni mövsümdə 3 oyuna 2 qol və 2 məhsuldar ötürmə ilə fərqlənib.
Argentinalı ulduzun “İnter Mayami” karyerası ümumilikdə 42 oyun, 36 qol və 20 məhsuldar ötürmədən ibarətdir. Messi “vağlar”ın tarixinin ən sərrast qoçusudur.
Ulduz hücumçu ötən il Mayami təmsilçisi ilə Liqalar kubokunu qazanıb, həmçinin ötən mövsüm “İnter Mayami”nin heyətində MLS-in Şərq Konfransının qalibi olub. Müvafiq qənimət “Leo”nun futbolçu karyerası ərzində qazandığı 46-cı qənimətdir. Əlavə edək ki, Messi futbol tarixində ən çox qənimət qazanmış oyunçudur.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 191 oyun keçirib, 112 qol vurub və 61 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
