Azərbaycanın veteran cüdoçuları Sloveniya təşkil olunmuş Avropa çempionatının komanda yarışlarında böyük uğura imza atıblar.
Arena.az xəbər verir ki, Podçetrtek şəhərində usta cüdoçular arasında keçirilən qitə birinciliyində bu gün komanda yarışları baş tutub.
Azərbaycan komandası kişilər arasında 30 yaşa qədər cüdoçular arasında birinci yeri tutublar.
Yığmamız ilk görüşdə və yarımfinalda Fransanın komandalarını məğlub edərək finala yüksəlib. Finalda Azərbaycan yığması Belçikaya 3:1 hesabı ilə qalib gələrək çempionatın kubokunu və qızıl medallarını qazanıb.
Komandanın baş məşqçisi, veteranlar arasında 9 qat Avropa çempionu Fərhad Rəcəbli komanda və oğlunu çalışdırması ilə bağlı hislərini Avropa Cüdo Birliyinin rəsmi saytına verdiyi müsahibəsində belə ifadə edib: “Əvvəl məqsəd sadəcə medal qazanmaq idi, lakin yarış başladıqda anladım ki, biz qızıl medal qazana bilərik və bunu bacardıq. Buna görə özümü inanılmaz dərəcədə xoşbəxt hiss edirəm. Biz ildə iki böyük çempionatda – Avropa və dünya çempionatında iştirak edirik. Bu, mənim üçün böyük zövqdür, hər şey cüdodan həzz almaqdan ibarətdir. Azərbaycanda veteran komandamız var və birlikdə məşq edirik, buna görə də güclü ruh var. O ki qaldı oğluma, mənə bu səfəri onunla birlikdə keçirmək xoş olsa da, yarışlarda olduğumuz zaman onunla digər cüdoçular arasında fərq qoymuram, mənim üçün hamısı eynidir.”
Xatırladaq ki, Azərbaycanın veteran cüdoçuları bu Avropa çempionatında fərdi yarışlarda da ümumilikdə 4 qızıl, 2 gümüş və 5 bürünc medal əldə ediblər.
