Futbol üzrə İsveçrə yığma komandasının və “Yanq Boyz”un hücumameyilli yarımmüdafiəçisi Fabian Rider “Renn”ə keçib.
Arena.az xəbər verir ki, bu barədə Liqa 1 klubu rəsmi saytı vasitəsilə məlumat yayıb.
21 yaşlı futbolçu ilə 4 illik müqavilə imzalanıb. “Renn” bu transfer üçün 15 milyon avrosundan keçib.
Fabian Rider “Yanq Boyz”un yetirməsidir. O, 2020-ci ildən etibarən bu klubun əsas komandasında 122 oyuna çıxıb, 15 qol, 24 məhsuldar ötürmə müəllifi olub. Rider İsveçrə yığmasında 4 matç keçirib.
“Renn” sağ cinah vingeri Lum Tçaunanı da “Salernitana”ya satıb. Fransızlar bu satışdan 3 milyon avro qazanıblar. 19 yaşlı fransız forvard İtaliya klubu ilə 3+1 illik müqavilə bağlayıb. Hücumçu ötən mövsüm icarə əsasında “Dijon”un da formasını geyinib, Fransanın aşağı yaş qrupları üzrə yığmalarında oynayıb.
“Salernitana”nın dayaq yarımmüdafiəçisi Mamadu Kulibali isə “Palermo”ya keçib. 24 yaşlı seneqallı satınalma şərti ilə mövsümün sonuna kimi icarəyə götürülüb. O, “Peskara”, “Udineze”, “Karpi”, “Virtus Entella”, “Trapani” və “Ternana” kimi klubların da formasını geyinib.
“Renn” də hücumçusu Mattis Ablini “Nant”a icarəyə verib. Liqa 1 təmsilçisi 20 yaşlı fransızı mövsümün sonuna kimi satınalma şərti ilə heyətinə qatıb. “Renn”in yetirməsi olan Fransanın U-21 yığmasının forvardı “Havr” və “Oser”də də icarədə olub.
Yeri gəlmişkən, “Nant” “Brest”in mərkəz müdafiəçisi Jan-Kevin Düverni də heyətinə qatıb. 26 yaşlı fransız azad agent kimi keçdiyi yeni klubu ilə 4 illik müqavilə bağlayıb. Müdafiəçi “Brest”dən öncə yetirməsi olduğu “Lans”da da forma geyinib.
“Nant” Braziliyanın “Korintians” klubundan Adson Ferreyra Soaresi də transfer edib. Liqa 1 klubu bu keçid üçün 5 milyon avro ödəyib. 22 yaşlı hücumameyilli yarımmüdafiəçi ilə 5 illik müqavilə imzalanıb. Braziliyalı futbolçu buna qədər yalnız yetirməsi olduğu “Korintians”da oynayıb və ilk dəfə fərqli klubun formasını geyinəcək, legioner həyatı yaşayacaq.
“Nant”ın sol cinah müdafiəçisi Şarl Traore də azad agent kimi “Bastiya”ya keçib. Mali yığmasında da 10 oyun keçirmiş 31 yaşlı futbolçu yeni klubu ilə 2+1 illik müqaviləyə imza atıb.
