“Liverpul”un baş məşqçisi, niderlandlı mütəxəssis Arne Slot hələ gənc yaşlarından məşqçi olmaq arzusunda olduğunu etiraf edib.
Arena.az “Liverpul”un rəsmi saytına istinadən, niderlandlı mütəxəssisin bu barədə xatirəsini təqdim edir:
“Düşünürəm ki, gənc yaşlarımda məşqçi və ya idarəçi olmaq istədiyimi bilirdim. Atam həvəskarlar dərnəyində məşqçi idi, özü də müəllim olduğu üçün daim məşğul olardı. O, tez-tez məndən onun yerinə məşğələlər keçə biləcəyimi soruşardı və bu, mənə həmişə xoş gələrdi”, deyə Slot xatırlayıb.
Arne Slot məşqçilik fəaliyyətinə 2016/2017-ci illər mövsümündə “Kambyur” klubunda başlayıb. Sonra niderlandlı mütəxəssis “AZ Alkmar” (2019/2020) və “Feyenoord”u (2021/2024) çalışdırıb və məhz bu iki komanda ilə uğurlu işi ilə adından söz etdirib.
Slot “Liverpul”un sükanı arxasında cari ilin iyul ayından fəaliyyətdədir. “Qırmızılar” 46 yaşlı niderlandlı mütəxəssislə müddəti 2027-ci ilin iyun ayının sonuna qədər qüvvədə olacaq müqavilə imzalayıblar.
Niderlandlı mütəxəssis “Liverpul”u 14 oyuna çıxarıb, 12 qələbə, 1 heç-heçə, 1 məğlubiyyət yaşayıb, “qırmızılar”ın top fərqi isə 31:9 nisbətindədir.
Slotun qənimətlər muzeyində “Feyenoord”la qazandığı Niderland çempionluğu və Niderland Kuboku var.
İngiltərə Premyer Liqasının 9 turundan sonra Slotun “Liverpul”u 22 xalla yarış cədvəlinin 2-ci pilləsində qərarlaşıb.
