“Mançester Siti”nin italiyalı baş məşqçisi Entso Mareska futbol üzrə İngiltərə Premyer Liqasının tarixində yeni rekorda imza atıb.
Arena.az xəbər verir ki, italiyalı mütəxəssis liqa tarixində bir klubun baş məşqçisi təyin olunduqdan sonra ilk 7 oyununun hamısında qələbə qazanmış ilk məşqçi olub.
Bu nailiyyət Mareskanın komandasının İngiltərə çempionatının 7-ci turunda doğma meydanda “İpsviç Taun”u 3:2 hesabı ilə məğlub etməsindən sonra gerçəkləşib.
Bundan əvvəl italiyalı Karlo Ançelotti (“Çelsi”, 2009/2010), ispaniyalı Xosep Qvardiola (“Mançester Siti”, 2016/2017) və norveçli Ole-Qunnar Sulşer (“Mançester Yunayted”, 2018/2019) İngiltərə Premyer Liqasında baş məşqçi kimi ilk 6 oyunlarının hamısında qalib gəlmişdilər.
Mareskanın “Mançester Siti”nin baş məşqçisi təyin olunması barədə iyun ayında məlumat yayılıb. O, bundan əvvəl İngiltərənin “Çelsi” klubunda çalışıb və yanvarda vəzifəsindən ayrılıb. İtaliyalı mütəxəssisin rəhbərliyi altında London təmsilçisi Avropa Konfrans Liqasının və klublararası dünya çempionatının qalibi olub.
Entso Mareska “İpsviç Taun” üzərində qazanılan 3:2 hesablı qələbəni də şərh edib. O, matçdan sonra klubun mətbuat xidmətinə açıqlamasında bunları söyləyib:
“Biz oyuna nəzarət edirdik, qol imkanları yaradır və qollar vururduq. Dördüncü qolu vursaydıq, qalib məsələsi həll olunacaqdı. Belə olmayanda isə bir qədər həyəcan keçirməli olduq. Amma bu, normaldır, futbolda belə hallar olur. Qazandığımız üç xaldan razıyam”.
