Azərbaycanlı yarımmüdafiəçi Asim Əlizadə futbol üzrə Latviya çempionatında növbəti matçına çıxıb. Arena.az xəbər verir ki, “Dauqavpils”in üzvü olan 22 yaşlı futbolçu 4-cü tur çərçivəsində baş tutan “Liepaya” ilə matçın iştirakçısı olub.
“Dauqavpils” bu rəqiblə səfərdə qarşılaşıb. Futbolçumuzun komandası bu oyunda ağır məğlubiyyətə üzülüb – 1:5.
Asim bu görüşün ilk dəqiqələrindən meydanda olub. O, 61-ci dəqiqədə əvəzlənib.
Dörd turdan sonra 4 xalı olan “Dauqavpils” 10 iştirakçı arasında 6-cı pillədə qərarlaşıb.
Xatırladaq ki, müqavilə ilə “Neftçi”yə məxsus olan Asim Əlizadə “Dauqavpils”də icarə əsasında çıxış edir. Martın əvvəlində Latviya klubuna keçən gənc futbolçu bu mövsümün sonuna, yəni noyabrın 20-dək “Dauqavpils”in uğurları üçün çalışacaq.
Asim “Neftçi”nin əvəzedici komandasının aparıcı futbolçularından biri idi. O, əsas komandanın heyətində ötən mövsüm 1, bu mövsüm 2 rəsmi oyunda meydana çıxmışdı. Yarımmüdafiəçi Azərbaycanın U-21 yığmasının da üzvü olub.
