“Əl-Hilal”ın braziliyalı superulduzu, hücumçu Neymarın atası Neymar da Silva oğluna dəstək nümayış etdirib.
Arena.az məlumat verir ki, Neymar da Silva öz şəbəkə hesabı üzərindən dərc etdiyi yazısında oğlunun 2026-cı il dünya çempionatının seçmə mərhələsində Uruqvayla oyunda (0:2) aldığı ağır zədəyə rəğmən, futbolun onu gözlədiyini ifadə etdiyi mənəvi dəstəyini göstərib:
“İndi mən bilirəm ki, niyə Səudiyyə Ərəbistanı! İndi bilirəm niyə “Əl-Hilal”. Tanrı artıq bilirdi… O, səni ayırmalı idi, yaxşını pisdən ayırmalı idi… Səni təsəlli etmək üçün sənə nə deyəcəyimi bilmirəm, məhz indi də gərəkli sözlər tapa bilmirəm, oğlum!
Bacarsaydım, sənin yerini tutardım. Mən razılaşma adamı deyiləm, amma sənin və bacın üçün canımı verərdim ki, əziyyət çəkməyəsiniz. Tanrı, həyatına bir neçə sınaq və yıxılma verdi ki, sonradan həmişə ayağa qalxasan. İsa bizə həm meydanda, həm də meydandan kənarda məğlubiyyətimizi gözləyən hiyləgər düşmənlərə qarşı saysız-hesabsız döyüşlər və mübarizələr gətirdi. İndi bu düşmənlər, onlar isə azdırlar, bu andan qidalanırlar.
Bu ismarış sənin üçün deyil, oğlum… Çünki mən sənə bilməli olduğun hər şeyi artıq söylədim. Bu ismarış mənəvi cəhətdən əhəmiyyətlidir və mən bu sınaqlarda kiminlə qarşılaşdığımızı bilirəm. Tanrı məni sənin atan, sənin müəllimin, dostun etdi, iş adamı yox. Taleyimizi nəzərə alaraq, inan, həmişə olduğu kimi, fəsadların öhdəsindən gələcəyik və onlardan çıxacağıq.
Biz olmamız gərək olan yerdəyik, inan mənə – uzaq bir ölkədə, amma səni sevən, bütün çatışmazlıqların və fəzilətlərinlə səni qəbul edən insanların olduğu yerdə… İndi mən bilirəm niyə “Əl-Hilal”. İndi axmaqlara qulaq asma, onların öz taleyi var… Tanrı lazım olan vaxtda onların qayğısına qalacaq. Ailəmiz, dostlarımız, hazırkı klubumuz, milli komandamız və futbolumuz səni gözləyəcək!” – Neymarın atası duyğusal yazı ilə oğluna mənəvi dəstəyini ifadə edib.
Neymar azı 4 ay futbol oynaya bilməyəcək
Xatırladaq ki, Neymarın Uruqvayla oyunda aldığı zədə çox ciddidir. Buna qədər də futbolçu yüngül zədədən əziyyət çəkirdi. İlkin məlumata görə braziliyalı superulduz 2023-cü ildə bir daha yaşıl meydanlara çıxa bilməyəcək. Neymarın ön çarpaz bağ zədəsi və dizində menisk yırtığı olduğu təsdiqlənib. Məşhur futbolçu əməliyyat ediləcək və sonra uzun bir müalicə proqramı çərçivəsində bərpa kursu keçməli olacaq. Ulduz hücumçunun azı 4 ay futbol oynaya bilməyəcəyi qeyd olunur.
Braziliyalı futbolçu cari ilin yay transfer pəncərəsində PSJ-dən “Əl-Hilal”a keçib. Tərəflər arasında sonradan bir il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avroya başa gəlib. Bu məbləğ Neymarın təxmin edilən bazar qiymətindən bahadır.
Neymar geridə qalmış 2022/2023 mövsümündə mütəmadi olaraq zədələrdən əziyyət çəkməsinə rəğmən, PSJ-nin heyətində 29 oyuna 18 qol vurub, 17 məhsuldar ötürmə verib və Fransa çempionatını qazanıb.
Cari mövsümdə Neymar “Əl-Hilal”ın heyətində 5 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.
“Transfermarkt” internet-portalı Neymarı 60 milyon avro məbləğində qiymətləndirir.
