Futbol üzrə Azərbaycan millisinin hücumçusu Mahir Emreli Xorvatiyanın “Dinamo” (Zaqreb) komandasında növbəti matçına çıxıb.
Arena.az xəbər verir ki, futbolçumuzun komandası bu gün Avropa Konfrans Liqasının qrup mərhələsinin 1-ci turu çərçivəsində Qazaxıstan təmsilçisi “Astana” ilə qarşılaşıb.
Doğma meydanda baş tutan bu oyun Zaqreb təmsilçisinin qələbəsi ilə başa çatıb – 5:1.
Mahir bu matça start heyətdə başlayıb. Azərbaycanlı futbolçu 65-ci dəqiqədə, hesab 3:0 olarkən əvəzlənib. Cari mövsümdə 2 qol və 1 assist müəllifi olan Emreli bu dəfə fərqlənə bilməyib.
Xatırladaq ki, Mahir Emreli “Dinamo”ya 2022-ci ilin fevral ayında Polşanın “Legiya” (Varşava) klubundan transfer olunub. O, bu komandanın heyətində bütövlükdə 34 matça çıxıb, 7 qol vurub, 2 məhsuldar ötürmə müəllifi olub.
