UEFA bu həftə baş tutan avrokubok oyunlarından sonra həftənin oyunçusu adına namizədlərin siyahısını açıqlayıb. Arena.az xəbər verir ki, hər üç qitəmiqyaslı turnirin ən yaxşısı adına 4 namizəd var.
UEFA Çempionlar Liqasında namizədlər bunlardır: Cud Bellingem (“Real”, İspaniya), Joao Feliks (“Barselona”, İspaniya), Martin Edeqor (“Arsenal”, İngiltərə), Qaleno (“Portu”, Portuqaliya).
Cud Bellingem “Union Berlin”ə qarşı keçirdikləri ev oyununda (1:0) komandasının yeganə qoluna imza atıb.
Martin Edeqor PSV-ni 4:0 hesabıyla yendikləri qarşılaşmada 1 qol vurub, 1 məhsuldar ötürmə edib.
Joao Feliks “Antverpen”i 5:0 hesabıyla yendikləri matçda 2 qol və 1 asist müəllifi olub.
Qaleno da Donetsk “Şaxtyor”u ilə səfər oyunundakı 3:1 hesablı qələbədə dubl və 1 assistlə pay sahibi olub.
Avropa Liqasında namizədlər bunlardır: Ladislav Kreyçi (“Sparta”, Praqa, Çexiya), Adrien Truffer (“Renn”, Fransa), Amin Adli (“Bayer”, Almaniya), Karlos Borges (“Ayaks”, Niderland);
Ladislav Kreyçi Limassol “Aris”inə 3:2 hesabıyla qalib gəldikləri ev oyununda dubla imza atıb.
Adrien Truffer də Hayfa “Makkabi”sinə 3:0 hesabıyla qalib gəldikləri ev oyununda bir qolla pay sahibi olub.
Karlos Borges Marsel “Olimpik”i ilə 3:3 hesablı heç-heçədə 1 qol və 1 assistlə yadda qalıb.
Amin Adli də doğma meydanda “Hakken”i 4:0 hesabıyla yendikləri matçda 1 qol vurub, 1 məhsuldar ötürmə edib.
Avropa Konfrans Liqasında həftənin oyunçusu adına namizədlər isə bunlardır: Zvonimir Kojul (“Zrinski”, Bosniya və Herseqovina), Ernest Muçi (“Legiya”, Varşava, Polşa), Yakub Pyotrovski (“Ludoqorets”, Bolqarıstan), Luka Ranyeri (“Fiorentina”, İtaliya).
Luka Ranyeri “Genk”lə səfər matçında (2:2) komandasının hər iki qolunun müəllifi olmaqla diqqət mərkəzinə düşüb.
Zvonimir Kojul da “Alkmar” üzərində 4:3 hesablı əzmkar və möhtəşəm qələbədə 2 qol və 1 assistlə pay sahibinə çevrilib.
Yakub Pyotrovski də Trnava “Spartak”ı üzərindəki 4:0 hesablı qələbədə 2 qol və 1 assistlə diqqət mərkəzinə düşüb.
Ernest Muçi isə “Aston Villa”nı 3:2 hesabıyla məğlub etdikləri oyunda dublla yadda qalıb.
