Çempionlar Liqasının (ÇL) gələn həftə keçiriləcək oyunlarından əvvəl Nepalda baş verən sel qurbanlarının xatirəsi bir dəqiqəlik sükutla yad ediləcək.
Arena.az xəbər verir ki, bu barədə UEFA-nın mətbuat xidməti məlumat yayıb.
Həmçinin hər matçdan əvvəl meydanda “Siz tək deyilsiniz, Nepal” sözləri yazılmış banner nümayiş etdiriləcək.
“Bütün Avropa futbol ailəsi bu həftəki oyunlardan əvvəl Nepal xalqına dərin hüznlə başsağlığı və dəstəyimizi ifadə etmək üçün bir araya gələcək. Onlara bu faciədən və onun nəticələrindən sonra bərpa prosesini davam etdirmək üçün güc və dözüm arzulayırıq”, – deyə UEFA prezidenti Aleksander Çeferin bildirib.
Xatırladaq ki, avqustun 26-da Nepalın şimalında güclü sel baş verib. Təbii fəlakətə Çin sərhədində, “Rasuvagadhi” sərhəd-keçid məntəqəsindən təxminən 20 kilometr şimal-şərqdə uçqunun baş verməsi səbəb olub.
Dağ süxurlarından ibarət böyük kütlə yüksək sürətlə çay yatağı boyunca 70 kilometrdən çox məsafə qət edərək yaşayış məntəqələrini dağıdıb və geniş ərazini su altında qoyub.
Son məlumatlara görə, təbii fəlakət nəticəsində 1300-dən çox insan həyatını itirib. Təxminən 32 min ailə evsiz qalıb, 7500-ə yaxın ev dağılıb. Nepalın mərkəzi hissəsində həyati əhəmiyyətli infrastrukturun fəaliyyəti ciddi şəkildə pozulub.
Təxminən 5 min nəfər, o cümlədən 589 xarici vətəndaş itkin düşmüş hesab olunur.
Qeyd edək ki, ÇL-in 2026/2027-ci illər mövsümündə Azərbaycan çempionu “Sabah” da mübarizə aparacaq. Paytaxt klubu Liqa mərhələsinin ilk turunda İngiltərə nəhəngi “Mançester Yunayted”lə üz-üzə gələcək.
