“İnter Mayami”nin (ABŞ) hücumçusu Lionel Messi Argentina milli komandasındakı son oyunundan sonra göz yaşlarını saxlaya bilməyib.
Arena.az xəbər verir ki, 39 yaşlı hücumçu vida matçından sonra tribunalara müraciət edərək milli komandadakı karyerasının başa çatması ilə bağlı hisslərini bölüşüb.
Argentina millisi Buenos-Ayresdə Benini 3:0 hesabı ilə məğlub edib. Messi qarşılaşmada 1 qol vurub və 2 məhsuldar ötürmə edib. Bu görüş onun Argentina millisinin formasında sonuncu oyunu olub.
“Bu gün karyeramın ən kədərli gününü yaşamalıyam – milli komanda ilə vidalaşıram. Bundan sonra onun üçün azarkeşlik edəcəyəm. Sizi sevirəm. Argentinalı olduğum üçün Allaha minnətdaram. Çox sağ olun”, – Messi deyib.
Vida mərasimindən sonra göz yaşlarına hakim ola bilməyən argentinalı ulduz milli komandanın formasını 20 il geyinməyin onun üçün böyük qürur olduğunu vurğulayıb.
“Bu formanı 20 il geyinmək inanılmaz qürur idi. Mən hər şeyimi verdim. Kaş bütün ömrüm boyu oynaya biləydim, amma başa düşürəm ki, bu fəsil artıq bitib”, – Messi bildirib.
Messi Argentina millisində 208 oyun keçirib və 126 qol vurub. O, hər iki göstəricidə milli komandanın rekordçusudur. Hücumçu 6 dünya çempionatında iştirak edib.
Argentina millisində dünya çempionu (2022), ikiqat Amerika Kuboku qalibi (2021, 2024) və Olimpiya çempionu (2008) olan Messi milli karyerasını 8 “Qızıl top” mükafatı ilə də tarixə düşərək başa vurub.
Lionel Messi klub səviyyəsində çıxışını davam etdirir. O, 2023-cü ildən ABŞ-ın “İnter Mayami” klubunun formasını geyinir.
