“Sabah”ın baş məşqçisi Valdas Dambrauskas UEFA Çempionlar Liqasının əsas mərhələsində “Slaviya”ya qarşı keçirdikləri oyunu şərh edib.
Arena.az xəbər verir ki, Azərbaycan çempionu bu gün ÇL-in Liqa mərhələsinin 2-ci turu çərçivəsində Bakıda qəbul etdiyi Çexiyanın “Slaviya” (Praqa) komandasına 2:0 hesabıyla qalib gələrək tarixi zəfərə imza atıb.
Dambrauskas matçdan sonra təşkil edilmiş mətbuat konfransında bunları söyləyib:
“Biz oyuna təzyiqlə başladıq. Rəqibi yaxşı analiz etmişdik. İlk 20-25 dəqiqə ərzində topa daha çox sahib olan tərəf idik. Lakin qarşılaşmanın irəliləyən dəqiqələrində topa sahib olma nisbəti bərabərləşdi. “Slaviya” fiziki cəhətdən çox güclü komandadır. Bu cür komandalara qarşı oynayarkən, onların müdafiədəki boşluqlarını tapmaq çətin olur. İkinci yarıda isə artıq boşluqları tapa bildik və bunun nəticəsində qol vurduq. Bəzi vaxtlarda bəxtimiz də gətirirdi. Öz şansımızı gözlədik və ikinci qolu vurduq. Çox sevinirəm ki, futbolçularım bütün tapşırıqları layiqincə yerinə yetirdilər. “Sabah” möhtəşəm nəticəyə imza atdı”.
Dambrauskas görüşün gedişində Stiv Solvetin əvəzlənməsinin səbəbini belə izah edib:
“Stiv Solvetin oyunun gedişində əvəzlənməsi sarı vərəqə alması ilə bağlı deyildi. Onun əvvəldən zədəsi var idi, sadəcə risk etməmək üçün Solveti əvəz etdik. “Sabah”ın həkimlərinə təşəkkür edirəm. O, sıralara daha gec dönməli olsa da, bu, erkən baş verdi. Sadəcə futbolçunun zədəsi yenilənməsin deyə, meydandan çıxardıq. Stiv bu gün çox gözəl oynadı”.
Litvalı mütəxəssis qarşıdakı oyunlar barədə də söhbət açıb:
“Çalışacağıq ki, növbəti qarşılaşmalarda daha yaxşı futbol sərgiləyək. Gələcək oyunlarda stadionda daha çox azarkeş gözləyirəm. Digər görüşlər barədə proqnoz verə bilmərəm. Lakin sevindirici haldır ki, bu gün nəticə ürəyimizcə oldu. Bizi qarşıda “Qəbələ” ilə Premyer Liqa matçı gözləyir. Daha sonra UEFA Çempionlar Liqasının növbəti qarşılaşmasına köklənəcəyik”.
