“Real”ın fransalı hücumçusu Kilian Mbappe UEFA Super Kuboku oyunundan sonra “qaymaqlılar”ın heyətində debütü haqda təəssüratını paylaşıb.
Arena.az xatırladır ki, həlledici oyunda “Real” “Atalanta” üzərində 2:0 hesablı inamla qələbə qazanıb, Mbappe isə debüt oyununda qolla fərqlənib:
“Oyundan həzz mənim vurduğum qoldan daha vacibdir. Çox xoşbəxtəm, özümü imtiyazlı oyunçu kimi hiss edirəm. Bizim əla komandamız var, bu, Madrid “Real”ıdır. Cud, Rodriqo, “Vini” əla oyunçulardır. Kollektiv oyunumuzu oyundan-oyuna təkmilləşdirəcəyik”, – “Madrid Universal” dərgisi Mbappedən sitat gətirir.
Kilian Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-nin düşərgəsinə keçib.
Geridə qalmış 2023/2024-cü illər mövsümündə Mbappe PSJ-nin heyətində bütün yarışlarda 47 oyuna çıxıb, 44 qol vurub, 10 məhsuldar ötürmə verib. Mbappenin Paris klubunun heyətində çxışının ümumi mənzərəsi isə belədir: 307 oyun, 256 qol, 108 məhsuldar ötürmə.
Vurduğu 256 qolla Mbappe PSJ tarixinin ən sərrast futbolçusudur.
Cari mövsümdə isə artıq məlum olduğu kimi, Mbappe “Real” heyətində 1 oyun keçirib və 1 qol vurub.
Kilian Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 84 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
Klub səviyyəsində Mbappe PSJ ilə 7 dəfə Fransa Liqa 1-in, 3 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, “Real”la UEFA Super Kubokunu qazanıb həmçinin dəfələrlə müxtəlif fərdi mükafatlara layiq görülüb.
“Transfermarkt” internet-portalı 25 yaşlı fransalı mərkəz hücumçusunun transfer dəyərini 180 milyon avro məbləğində qiymətləndirir. Bu isə Mbappenin dünyanın dörd ən bahalı futbolçusundan biri olması deməkdir.
