Niderland millisinin və İspaniyann “Jirona” klubunun mərkəz yarımmüdafiəçisi Donni van de Bek uzun müddətə sıradan çıxıb.
Arena.az xəbər verir ki, 28 yaşlı futbolçu üçün 2025/2026-cı illər mövsümü erkən başa çatıb.
Belə ki, “Jirona”nın yarımmüdafiəçisi aldığı ağır zədə üzündən uzun müddət oynaya bilməyəcək. Niderlandlı oyunçu axill vətərlərinin qopması üzündən əməliyyat olunmalıdır. Belə zədələrin müalicəsi üçün isə 7-8 ay tələb olunur.
Xatırladaq ki, Van de Bek ötən mövsümü də vaxtından əvvəl qapamışdı. Ağır zədə alan yarımmüdafiəçi o zaman da mövsümün böyük hissəsində İspaniya klubuna yardım edə bilməmişdi.
Donni van de Bek 2024-cü ildə daha öncə icarədə olduğu “Jirona”ya “Mançester Yunayted”dən transfer olunmuşdu. Klubu ingilislərin “Ayaks”dan 39 milyon avroya aldığı oyunçunun keçidi üçün cəmi 500 min ödəmişdi. Onun İspaniya klubu ilə müqaviləsi 2028-ci ilin yayında bitəcək.
Donni “Jirona”nın heyətində cari mövsümdə cəmi 2 oyuna çıxıb. O, La Liqa təmsilçisinin heyətində bütövlükdə 37 oyun keçirib, 3 qol və 2 assist müəllifi olub.
Van de Bek əvvəllər “Ayaks”, “Ayntraxt” (Frankfurt) və “Everton”da da forma geyinib.
Niderlandın aşağı yaş qrupları üzrə müxtəlif yığmalarında oynamış Donni, 2017-ci ilin noyabrında əsas millidə debüt edib. O, Niderland yığmasında 19 oyuna 3 qol vurub, 1 məhsuldar ötürmə müəllifi olub.
“Transfermarkt” internet-portalı 28 yaşlı yarımmüdafiəçinin transfer dəyərini 5 milyon avro məbləğində qiymətləndirir.
