“İnter Mayami”nin argentinalı ulduz hücumçusu Lionel Messi MLS və Avropa futbolundakı təzyiqi müqayisə edib.
Arena.az AS dərgisinə istinadən, argentinalı ulduzun bu barədə fikirlərini təqdim edir:
“MLS-də həftədə çox oyun keçirmirsən. Bu, Avropadan fərqli olaraq sizə yaşamaq, başqa şeylər etmək üçün vaxt verir.
Avropada ilk növbədə özünə baxırsan, yaxşı dincəlirsən, yaxşı yeyirsən, sonra nəticə əldə etməsək, həftə ərzində etdiyin hər şeydən məhrum ediləcəksən.
MLS-də bu mənada azacıq daha çox azadlığın var. Baxmayaraq ki, hamımız hər zaman qalib gəlmək istəsək də, dediyim kimi, sən bunu fərqli qəbul edirsən. Təzyiq fərqlidir”, deyə “Leo” vurğulayıb.
Lionel Messi 2023-cü ilin yayından “İnter Mayami”də çıxış edir. Argentinalı ulduz MLS təmsilçisinə PSJ-dən azad agent qismində qoşulub. “Leo”nun amerikan klubu ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Buna qədər Messi yalnız “Barselona” və PSJ-də çıxış edib.
Argentinalı ulduz cari mövsümdə “İnter Mayami”nin heyətində bütün yarışlarda 15 oyuna çıxıb, 14 qol vurub və 11 məhsuldar ötürmə verib. Təcrübəli futbolçunun “İnter Mayami” karyerası ümumilikdə 29 oyun, 25 qol və 16 məhsuldar ötürmədən ibarətdir.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. 18 il ərzində ulduz hücumçu yığmada 183 oyun keçirib, 108 qol vurub və 58 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz yığma ilə Yay Olimpiya Oyunlarının (2008), Amerika Kubokunun (2021), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının gümüş (2014), Amerika Kubokunun gümüş (2007, 2015, 2016) mükafatçısı olub.
“Transfermarkt” internet-portalı 36 yaşlı Lionel Messinin transfer dəyərini 30 milyon avro məbləğində qiymətləndirir.
