İtaliyan jurnalist Daniel Riolo PSJ və Fransa yığmasının ulduz hücumçusu Kilian Mbappenin həyat tərzini kəskin tənqid edib.
Arena.az bu barədə “Footmercato” dərgisinə istinadən məlumat verir.
Xatırladaq ki, Çərşənbə günü, oktyabrın 4-də Çempionlar Liqasının qrup mərhələsinin 2-ci turu çərçivəsində səfərdə PSJ “Nyukasl”a gözlənilmədən böyük hesabla məğlub olub – 1:4. Mbappe rəqib qapısına cəmi-cümlətanı bircə zərbə endirib, bir dəfə uğursuz driblinq yerinə yetirib və topa 51 toxunuş edib.
Jurnalist Riolo bu mənzərəyə kəskin tənqidlə cavab verib:
“Mbappenin keçən il Neymara ünvanladığı məşhur ifadəni xatırlayıram: “Yaxşı qidalanmaq, yaxşı yatmaq gərəkdir”.
Müvəqqəti cəza səbəbindən Kilian yeni mövsümə bərbad hazırlıq keçirib. Çox zəif hazırlaşanda, meydanda daha az iş əlindən gəlir.
Mbappenin lider olduğu nəsə varsa, o da Parisdəki ən pozğun axşam məclisləridir. Ətrafındakı hər kəs onun “ad-sanı”ndan danışır… O, çox ehtiyatlı olmalıdır, çünki o, bu həyat tərzinin nəticələrini çox gözləməli olmayacaq”, deyə Riolo müvafiq həyat tərzinin nəyə gətirib çıxaracağına işarə vurub.
Cari mövsümdə Mbappe PSJ-nin heyətində 8 oyun keçirib, 8 qol vurub.
“Transfermarkt” internet-portalı Mbappeni 180 milyon avro məbləğində qiymətləndirir.
