Şahmat üzrə norveçli dünya çempionu Maqnus Karlsenin təşkil etdiyi Çempionlar Turunun “New In Chess” adlı 5-ci mərhələsində son 5 turun görüşləri keçirilib.
Arena.az xəbər verir ki, Azərbaycan təmsilçilərindən Teymur Rəcəbov və Şəhriyar Məmmədyarov 11-ci turda üz-üzə gəliblər. Məmmədyarovun ağ, Rəcəbovun isə qara fiqurlarla oynadığı görüş heç-heçə yekunlaşıb.
Rəcəbov növbəti partiyalarda Sergey Karyakin (Rusiya) və Lenyer Dominqeslə (ABŞ) ağ, Le Kuanq Lyem (Vyetnam) və Vidit Qucrati (Hindistan) ilə qara fiqurlarla qarşılaşıb. 34 yaşlı qrossmeyster ilk görüşdə olduğu kimi, son 4 partiyada da sülhə razılaşıb.
Məmmədyarov isə Levon Aronyan (Ermənistan) və Maqnus Karlsenlə (Norveç) ağ, Aryan Tari (Norveç) və Yohan-Sebastyan Kristiansenə (Norveç) qarşı qara fiqurlarla mübarizə aparıb. Aronyan və Karlsenlə heç-heçə edən 36 yaşlı şahmatçı Tari və Kristiansenə qalib gəlib.
Bu nəticələrdən sonra Məmmədyarov təsnifat mərhələsini 9.5 xalla 3-cü, Rəcəbov isə 8.5 xalla 8-ci pillədə başa vuraraq, pley-offa vəsiqə qazanıblar. Azərbaycan təmsilçiləri ilə yanaşı, Maqnus Karlsen, Hikaru Nakamura, Uesli So (hər ikisi ABŞ), Levon Aronyan, Alireza Firuzca (FIDE) və Le Kuanq Lyem (Vyetnam) də 1/4 finala adlayıblar. Bu mərhələdə Rəcəbov Karlsenlə, Məmmədyarov isə Firuzca ilə qarşılaşacaq. Bu raund iki gün davam edəcək. Qarşılaşmaların ardından qalib müəyyənləşməsə, tay-brek oynanılacaq.
26 aprel
11-ci tur
Şəhriyar Məmmədyarov – Teymur Rəcəbov – 0,5:0,5
12-ci tur
Teymur Rəcəbov – Sergey Karyakin (Rusiya) – 0,5:0,5
Aryan Tari (Norveç) – Şəhriyar Məmmədyarov – 0:1
13-cü tur
Şəhriyar Məmmədyarov – Levon Aronyan (Ermənistan) – 0,5:0,5
Le Kuanq Lyem (Vyetnam) – Teymur Rəcəbov – 0,5:0,5
14-cü tur
Teymur Rəcəbov – Lenyer Dominges (ABŞ) – 0,5:0,5
Yohan-Sebastyan Kristiansen (Norveç) – Şəhriyar Məmmədyarov – 0:1
15-ci tur
Şəhriyar Məmmədyarov – Maqnus Karlsen (Norveç) – 0,5:0,5
Vidit Qucrati (Hindistan) – Teymur Rəcəbov – 0,5:0,5
27 aprel
1/4 final
Maqnus Karlsen (Norveç) – Teymur Rəcəbov
Şəhriyar Məmmədyarov – Alireza Firuzca (FIDE)
Levon Aronyan (Ermənistan) – Uesli So (ABŞ)
Le Kuanq Lyem (Vyetnam) – Hikaru Nakamura (ABŞ)
Ümumi mükafat fondu 100 000 ABŞ dolları olan turnirə mayın 2-də yekun vurulacaq. Qalib 30 000 ABŞ dolları qazanacaq.
