Xorvatiya millisinin baş məşqçisi Zlatko Daliç DÇ-2026-nın qrup mərhələsində Qana üzərində qazanılan 2:1 hesablı qələbəni şərh edib.
Arena.az xəbər verir ki, təcrübəli mütəxəssis komandasının pley-offa yüksəlməsindən məmnunluğunu ifadə edib.
“Futbolçuları pley-offa yüksəlmələri münasibətilə təbrik etmək istəyirəm. Bu, çətin qarşılaşma idi, amma mənim fikrimcə, Xorvatiya taktiki baxımdan əla oyun keçirdi və matça yaxşı hazırlaşmışdı.
Düşünürəm ki, biz doqquz il əvvəl başladığımız yola yenidən qayıtmışıq. Lakin bu, yalnız ilk məqsədimizə – pley-offa yüksəlməyə doğru atılmış kiçik addımdır”, – deyə Zlatko Daliç bildirib.
Mütəxəssis həmçinin komandanın azarkeşlər tərəfindən hər zaman dəstəklənməli olduğunu vurğulayıb:
“Bu milli komanda daha yaxşı münasibətə layiqdir, çünki Xorvatiya üçün çox sayda azarkeş azarkeşlik edir. Onlar qalib gəlsələr də, uduzsalar da, ölkə və xalq üçün etdiklərinə görə sevilməlidirlər. Bunu qiymətləndirmək lazımdır və məğlubiyyət anında komandaya qarşı çıxmaq düzgün deyil”, – deyə o qeyd edib.
Daliç veteran yarımmüdafiəçi Luka Modriçin çıxışına da xüsusi toxunub:
“Luka Modriç sadəcə möhtəşəm idi. Bu, onun xarakterini və enerjisini göstərir. O anlayır ki, bu, onun son dünya çempionatıdır və maksimumunu verməyə çalışır. Ümid edirəm ki, sağlam qalacaq və mümkün qədər uzun müddət Xorvatiya millisində çıxış edəcək”.
Qana millisinin baş məşqçisi Karlos Keyroş isə oyunun ədalətli nəticəsinin heç-heçə olduğunu düşünür:
“Qələbə münasibətilə Xorvatiyanı təbrik etməliyik. Rəqib bizdən daha az səhv etdi və məhz buna görə qalib gəldi. Bununla belə, hesab edirəm ki, matçın ədalətli nəticəsi heç-heçə olmalı idi”.
Qeyd edək ki, Xorvatiya Qananı 2:1 hesabı ilə məğlub edərək mundialın pley-off mərhələsinə yüksəlib.
