“Neftçi”nin AFFA İntizam Komitəsi tərəfindən cəzalanmış futbolçusu Ervin Koffi ilə bağlı apellyasiya şikayəti qismən təmin edilib.
Arena.az AFFA-nın rəsmi saytına istinadən xəbər verir ki, müdafiəçinin 2 oyunluq cəzası 1 görüşə endirilib.
Xatırladaq ki, fransalı oyunçu Azərbaycan Premyer Liqasının 2-ci turunda “Səbail”lə keçirilən matçdan sonra azarkeşlərə kənar əşya atmış və buna görə 2 oyun cəzaya məruz qalmışdı. “Neftçi” isə 2000 manat cərimə olunmuşdu.
Apellyasiya Arbitraj Tribunalı Koffinin cəzasının çəkilməyən 1 oyunu şərti ilə dəyişdirilib. Ona 3 ay sınaq müddəti qoyulub. Ancaq klubun cərimə məbləği olduğu kimi saxlanılıb.
Apellyasiya Arbitraj Tribunalının bu şikayətlə bağlı qərarlarını təqdim edirik:
- Şikayətçi “Neftçi” Peşəkar Futbol Klubunun apellyasiya şikayəti qismən təmin edilsin.
- 11 avqust 2024-cü il tarixdə Misli Premyer Liqasının II turunun “Səbail” – “Neftçi” oyunu bitdikdən sonra “Neftçi” klubunun 99 nömrəli futbolçusu Ervin Koffi azarkeşlərə kənar əşya atdığına görə futbolçunun 2 oyun cəzalanması, “Neftçi” klubunun 2000 manat cərimə edilməsi (AFFA İntizam Məcəlləsinin 40.4-cü maddəsi) barədə AFFA İntizam Komitəsinin 15 avqust 2024-cü il tarixli qərarı “oyun cəzası” sanksiyası hissəsində dəyişdirilsin.
- Futbolçu barəsində tətbiq olunan 2 oyunluq cəzanın çəkilməmiş hissəsi, yəni 1 oyunluq cəza şərti tətbiq edilsin.
- Futbolçu üçün şərti cəzanın çəkilməsinə görə 3 (üç) ay sınaq müddəti təyin edilsin.
- AFFA İntizam Komitəsinin 15 avqust 2024-cü il tarixli qərarı “cərimə sanksiyası” hissəsində qüvvədə saxlanılsın.
- Apellyasiya şikayəti qalan hissədə təmin edilməsin.
- Apellyasiya Arbitraj Tribunalının qərarından Lozannadakı (İsveçrə) İdman üzrə Arbitraj Məhkəməsinə (CAS) şikayət verilməsinin mümkünlüyü maraqlı tərəflərə izah edilsin.
- Qərarın tam mətni 30 (otuz) gün ərzində hazırlanaraq tərəflərə göndərilsin.
