Futbol üzrə Azərbaycan millisinin müdafiəçisi Cəlal Hüseynov Bolqarıstanın “Arda” komandasında növbəti matçına çıxıb.
Arena.az xəbər verir ki, 20 yaşlı müdafiəçi Bolqarıstan çempionatının 14-cü turu çərçivəsində keçirilmiş “Ludoqorets”lə oyunun iştirakçısı olub.
Doğma meydanda baş tutan bu qarşılaşmada “Arda” 1 xalla kifayətlənib – 0:0.
Hüseynov bu görüşün 60-cı dəqiqəsində meydana buraxılıb. O, 79-cu dəqiqədə sarı vərəqə ilə də cəzalanıb.
“Arda” 14 turdan sonra 23 xalla 16 iştirakçı arasında 6-cı pillədə qərarlaşıb. Komandanın ehtiyatda təxirə salınmış iki oyunu da var.
Xatırladaq ki, Cəlal Hüseynov Bolqarıstan təmsilçisi ilə bu il iyunun 12-də 3 illik müqavilə imzalayıb. “Arda” onu “Zirə”dən transfer edib. Azərbaycanlı futbolçu bu komandada 9 rəsmi oyuna çıxıb, 1 qol vurub.
