Türkəsilli isveçrəli mütəxəssis Hakan Yakın Türkiyənin “İstanbulspor” komandasının yeni baş məşqçisi təyin olunub.
Arena.az xəbər verir ki, bu barədə Super Liqa təmsilçisinin mətbuat xidməti məlumat yayıb.
46 yaşlı mütəxəssislə müqavilənin 2 illik olduğu açıqlanıb. O, 2024/2025 mövsümünün sonunadək İstanbul təmsilçisinə rəhbərlik etməlidir.
Hakan Yakın uzun illər İsveçrənin “Şaffhauzen” komandasında müxtəlif vəzifələrdə çalışıb. 2022/2023 mövsümündə isə o, bu klubun əsas komandasının baş məşqçisi olub.
Hakan “İstanbulspor”un baş məşqçisi postunda Fatih Tekkeni əvəz edib. Super Liqanın ilk 4 turunda 2 məğlubiyyət və 2 heç-heçənin ardından istefaya göndərilmiş 46 yaşlı mütəxəssis 2022-ci ilin oktyabr ayından bu komandanın baş məşqçisi idi. O, bu müddətdə komandanı 30 oyuna çıxarıb (9 qələbə, 5 heç-heçə, 16 məğlubiyyət).
Fatih Tekke əvvəllər də iki dəfə “İstanbulspor”a baş məşqçi təyin olunub. O, məşqçilik karyerası ərzində Türkiyənin U-23 yığmasına, həmçinin “Kayseri Ərciyəsspor”, “Boluspor”, “Manisaspor”, “Dənizlispor”, “Bursaspor” kimi komandalara da rəhbərlik edib.
Fatih Tekkenin istefasından sonra köməkçi məşqçi Olcay Dəmirin rəhbərliyi altında çıxış edən “İstanbulspor” hazırda Super Liqada 2 xalla 20 iştirakçı arasında 19-cu pillədə qərarlaşıb.
