Futbol üzrə İtaliya çempionu olan “Napoli”nin aparıcı futbolçularından olan belçikalı yarımmüdafiəçi Kevin De Bröyne zədələnib.
Arena.az bu barədə Neapol klubunun mətbuat xidmətinə istinadən xəbər verir.
Bildirilir ki, belçikalı futbolçu A Seriyasının 8-ci turunda “İnter”lə oyunda (3:1) sıradan çıxıb. 33-cü dəqiqədə penalti zərbəsindən hesabı açan belçikalı yarımmüdafiəçi elə həmin an zədələnib. Onun ən azı 3-4 ay yaşıl meydanlardan kənar qalması gözlənilir.
Xatırladaq ki, “Napoli” UEFA Çempionlar Liqasında Azərbaycan çempionu “Qarabağ”ın rəqiblərindən biridir. Bu komandalar arasındakı matç noyabrın 26-da Neapol şəhərində baş tutacaq. De Bröynenin Bakı vaxtı ilə saat 00:00-da start götürəcək bu görüşü buraxacağı şübhə doğurmur.
Xatırladaq ki, 2024/2025-ci illər mövsümünün başa çatması ilə “Mançester Siti”dən azad agent qismində ayrılmış De Bröyne “Napoli”yə qoşulub. Tərəflər 2 illik – müddəti 2027-ci ilin iyun ayının sonuna qədər qüvvədə olacaq müqavilə imzalayıblar.
De Bröyne cari mövsümdə “Napoli”nin heyətində 11 oyun keçirib, 4 qol vurub və 2 məhsuldar ötürmə edib.
Kevin De Bröyne “Genk”in məzunudur. Futbolçu, karyerası ərzində “Çelsi”, “Verder” (icarə), “Volfsburq” və “Mançester Siti”də oynayıb.
Kevin De Bröyne 2010-cu ilin avqustunda debüt etdiyi və hazırda kapitanı olduğu Belçika yığmasının heyətində 115 oyun keçirib, 36 qol vurub, 53 məhsuldar ötürmə verib.
“Transfermarkt” internet-portalı 34 yaşlı belçikalı hücumameyilli yarımmüdafiəçinin transfer dəyərini 20 milyon avro məbləğində qiymətləndirir.
