Azərbaycanlı hücumçu Renat Dadaşov Ukraynanın “Bukovina” klubuna keçidi, yeni komandası ilə bağlı ilk təəssüratları və hədəfləri barədə danışıb.
Arena.az xəbər verir ki, 27 yaşlı futbolçu Çernovtsı təmsilçisinə keçidi ilə bağlı qərarının necə formalaşdığını açıqlayıb.
Dadaşovun sözlərinə görə, “Bukovina”nın onunla maraqlandığını əvvəlcə agenti bildirib. Bundan sonra futbolçu klub haqqında məlumat toplayıb, komandanın oyunlarını izləyib və rəhbərliyin ona göstərdiyi münasibətdən müsbət təsirlənib:
“Əvvəlcə agentim mənə zəng etdi və Ukraynada bir variantın olduğunu, klubun mənimlə maraqlandığını dedi. Bundan sonra “Bukovina” haqqında məlumat toplamağa başladım. Klubun nümayəndələri ilə danışdım və bu komandaya qoşulmaq ideyası xoşuma gəldi. Futbola baxışları, oyun modeli və baş məşqçinin işi mənə çox uyğundur. Keçidə hazırlaşarkən “Bukovina”nın çoxsaylı oyunlarına baxdım və klubun məni komandada görmək istəyinin nə qədər güclü olduğunu hiss etdim. Bu, məni həqiqətən ruhlandırdı”.
Renat Dadaşov müqavilə imzalamaq qərarında məşqçilər korpusunun yanaşmasının və klubdakı insanların münasibətinin əsas rol oynadığını bildirib:
“Məndə dərhal belə bir hiss yarandı ki, məhz bu klubda olmalıyam. Çünki məni buraya gətirmək üçün hər şeyi 100 faiz etdilər. Qərarıma o qədər əmin idim ki, müqaviləni imzaladım. Burada, “Bukovina”nın futbolçusu olmaqdan xoşbəxtəm”.
Dadaşov Azərbaycan millisində qazandığı təcrübənin yeni klubunda ona kömək edəcəyini düşünür. O, milli komanda ilə klub futbolunun fərqli olduğunu vurğulayıb:
“Milli komanda və klub tamamilə fərqli şeylərdir. Çoxları bunun eyni olduğunu düşünür, amma belə deyil. Milli komandada ölkəni təmsil edirsən, klubda isə hər gün çalışırsan. Mən “Bukovina”da özümün ən yaxşı versiyası olmaq istəyirəm. Millidə də eyni şeyi etməyə çalışıram. Güclü yığmalara və yüksək səviyyəli futbolçulara qarşı oynadığım bütün təcrübəni kluba gətirə bilərəm. Milli komandada 90 dəqiqə ərzində konsentrasiyanı qorumağı öyrənirsən. Bu təcrübəni yeni komandama daşımaq və “Bukovina”nın rəngləri uğrunda mübarizə aparmaq istəyirəm”.
Renat Dadaşov üçün unudulmaz qol
Futbolçunun beynəlxalq karyerasındakı ən yaddaqalan məqamlardan biri isə ötən ilin noyabrında Fransa millisinə vurduğu qol olub. Dadaşov həmin qarşılaşmada hesabı erkən açmasını xüsusi hadisə kimi dəyərləndirib:
“Əlbəttə, hər şeyi təfərrüatı ilə xatırlayıram. Matçın dördüncü dəqiqəsi idi və Fransaya qol vuraraq hesabı 1:0 etdim. Emosiyalar və adrenalin həddindən artıq yüksək idi. Amma dərhal ağlımdan belə bir fikir keçdi: “Lənət olsun, qarşımızda fransızlarla demək olar ki, daha 90 dəqiqə var!”
Bütün qollar mənim üçün xüsusidir, amma bu, həqiqətən unikaldır. Çünki oyun Azərbaycanda keçirilirdi və bu, milli komandamızın tarixində Fransanın qapısına vurulan ilk qol idi. Möhtəşəm təcrübə idi, belə şeylər unudulmur”.
Renat Dadaşov Azərbaycan millisindəki digər qollarını da xatırlayıb və xüsusilə Slovakiya ilə oyunda vurduğu ilk qolu qeyd edib:
“Düzünü desəm, hər qol mənim üçün vacib və yaddaqalandır. Çünki ailənin mənsub olduğu, köklərinin olduğu ölkənin formasında qol vurursan. Almaniyada doğulsam da, özümü azərbaycanlı hiss edirəm. Ən yaddaqalan qolum, şübhəsiz, milli komandada ilk qolum – Slovakiyaya qarşı vurduğum qoldur. Fransa ilə oyundakı qol da mənim üçün xüsusi əhəmiyyət daşıyır. Bu iki qol milli komandada vurduğum yeddi qol arasında ilk sıralardadır”.
Maraqlıdır ki, Dadaşov düz bir il əvvəl Azərbaycan millisinin heyətində Ukraynaya qarşı meydana çıxıb. Hücumçu həmin vaxtdan 12 ay sonra Ukrayna klubuna keçəcəyini heç düşünmədiyini söyləyib:
“Düzünü desəm, yox. Amma futbola görə məhz bunu sevirəm: sabah harada olacağını heç vaxt bilmirsən. Bu, heyrətamiz təsadüfdür. Ukrayna millisinə qarşı həmin oyunu çox yaxşı xatırlayıram. İndi isə gözəl sarı rənglərdə çıxış edən klubla müqavilə imzalayıram. Bu, həqiqətən çox gözəldir”.
“Hər hekayənin yüksəlişləri və enişləri olur”
Almaniyada doğulub böyüyən Renat Dadaşov futbolçu kimi formalaşmasında bu ölkənin futbol məktəbinin böyük rol oynadığını bildirib. Onun sözlərinə görə, 15 yaşında akademiyaya keçməsi ciddi intizam və zəhmət tələb edib:
“Alman futbol mühiti məni tam formalaşdırıb. 15 yaşımda akademiyaya keçdim. Orada sənə ciddi intizam və ağır əmək öyrədirlər. Səhər məşqini məktəbdəki dərslərlə birləşdirirsən, sonra yenidən məşqə gedirsən, axşam isə yenə dərs oxuyursan. Bu, böyük intizam tələb edirdi və bu xüsusiyyət məni bugünkü futbolçu kimi formalaşdırdı”.
Renat Dadaşov Almaniyanın U-17 millisində hazırda “Arsenal”da çıxış edən Kay Havertsla birlikdə oynadığı dövrü də xatırlayıb. Hücumçu həmin vaxt onların sadəcə gələcəyi barədə düşünməyən gənc futbolçular olduğunu deyib:
“O vaxt biz sadəcə uşaqlar idik və karyeralarımızın necə formalaşacağını bilmirdik. Gənclər futbolundan zövq alır, Avropa çempionatının seçmə mərhələsində oynayırdıq. Həmin oyunlar məhz Azərbaycanda keçirilirdi. Kay Haverts birlikdə oynamağa başladığımız ilk vaxtlardan əla futbolçu idi. O, inanılmaz karyera qurdu və qurmaqda davam edir. Kay həm yaxşı insandır, həm də top səviyyəli futbolçudur. Onunla eyni soyunub-geyinmə otağını bölüşməyimizi və eyni səviyyədə çıxış etməyimizi xoş xatırlayıram”.
Dadaşovun klub karyerasında Almaniyanın “Ayntraxt”, İngiltərənin “Vulverhempton”, həmçinin Portuqaliya, İsveçrə, Türkiyə və Polşa klubları yer alıb. Futbolçu müxtəlif ölkələrdə keçirdiyi dövrlərin hər birindən yeni təcrübə qazandığını söyləyib:
“Hər hekayənin yüksəlişləri və enişləri olur. Bu, futbolda normal həyatdır. Hər ölkədə yeni bir şey qazandım: yeni mədəniyyət, taktiki biliklər, müxtəlif məşqçilərdən təcrübə. Karyeramda yalnız bir dövrü seçə bilmərəm. Amma İsveçrədə mənə çox xoş gəlirdi, çünki almanca sərbəst danışa bilirdim və bu, uyğunlaşmağımı asanlaşdırırdı.
Portuqaliyada da hər şey əla idi. Tanımadığım ölkəyə getdim, amma artıq bir il yarımdan sonra portuqal dilində sərbəst danışırdım. Hər dövrün yaxşı və pis tərəfləri olub. Amma ümumilikdə hər komandada böyük təcrübə qazandım”.
“Ukraynada olmaqdan səmimi zövq alıram”
Renat Dadaşov 20 yaşında İngiltərə Premyer Liqasına yaxınlaşsa da, “Vulverhempton”un heyətində rəsmi debüt edə bilməyib. O, geriyə baxıb bununla bağlı təəssüflənmək istəmədiyini bildirib:
“Düzünü desəm, geriyə baxmağı və belə şeylər haqqında düşünməyi çox sevmirəm. Mən orada idim, İngiltərə Premyer Liqası komandası ilə hər gün məşq edirdim və həmin səviyyəni içəridən görürdüm. Müəyyən vaxtda yaranmış vəziyyətə görə icarəyə getdim. Gənc futbolçu idim və oyun praktikasına ehtiyacım vardı. Amma üç-dörd il ərzində Premyer Liqa mühitində olmaq özü möhtəşəm təcrübə idi. Əlbəttə, rəsmi oyunda meydana çıxmaq şansım olsaydı, bundan imtina etməzdim. Amma tale başqa cür qərar verdi”.
Yeni klubunda çıxış edəcəyi Ukrayna futbolu barədə də danışan Dadaşov ölkədə güclü komandaların hər zaman olduğunu bildirib. O, Ukraynada oynayan dostlarının olduğunu və çempionatı izlədiyini söyləyib:
“Ukrayna futbolu haqqında çox şey bilirəm. Burada həmişə güclü klublar olub. Bundan başqa, dostlarım Ukraynada oynayıblar və buna görə çempionatı izləyir, oyunlara baxırdım. Ölkənin özü haqqında da məlumatım var idi, baxmayaraq ki, əvvəllər yalnız milli komandanıza qarşı oynamışdım. İndi isə burada yaşayacağam.
Hazırda gördüklərimdən çox xoşum gəlir. Burada həqiqətən hər şey çox gözəldir. Ukraynada olmaqdan səmimi zövq alıram. Artıq şəhərlə bir qədər tanış olmuşam və deyə bilərəm ki, Çernovtsı xoşuma gəlir. Gözəl şəhərdir”.
Renat Dadaşov əsas məqsədini açıqladı
Azərbaycan millisinin hücumçusu “Bukovina”da əsas məqsədinin komandaya fayda vermək olduğunu deyib. O, hücumçu kimi əsas vəzifəsinin qol vurmaq və məhsuldar ötürmələr etmək olduğunu vurğulayıb:
“İlk növbədə burada olduğum üçün xoşbəxtəm. Əsas məqsədim komandaya kömək etməkdir, ümid edirəm ki, komanda da mənə kömək edəcək. Mən hücumçuyam və işim qol vurmaq, komanda yoldaşlarıma məhsuldar ötürmələr etməkdir”.
Renat Dadaşov “Bukovina” azarkeşlərinə də müraciət edərək tribunaların dəstəyinin komanda üçün böyük əhəmiyyət daşıdığını bildirib:
“Sizə bir söz demək istəyirəm: dəstəyiniz bizim üçün təsəvvür edə biləcəyinizdən daha çox şey deməkdir. Oyunlarımıza gəlin, bizi həm evdə, həm də səfərdə dəstəkləyin. Təcrübəmə inanın: tribunalar enerjisini komandaya ötürəndə və futbolçuları bütün oyun ərzində dəstəkləyəndə komanda daha çox qələbə qazana bilər”.
Xatırladaq ki, Renat Dadaşov “Bukovina” ilə 1+1 illik müqavilə imzalayıb və yeni komandasında 9 nömrəli formanı geyinəcək. Azərbaycan millisinin hücumçusu Ukrayna klubuna azad agent kimi keçib.
