Futzal üzrə Azərbaycan millisi bu gün Avropa çempionatının final mərhələsində növbəti oyununu keçirib. Arena.az xəbər verir ki, komandamız Niderlandda təşkil olunmuş turnirdəki ikinci matçında İspaniya yığması ilə qarşılaşıb.
Joze Alesio da Silvanın çalışdırdığı kollektiv AÇ-2022-nin favoritlərindən sayılan bu rəqiblə oyunda sürprizə imza atmağa çalışıb. Komandamız hesabda iki dəfə önə keçdiyi oyundan 1 xalla ayrılıb. İspanlar hər iki qolun əvəzini çıxmağı bacarılar. Beləcə, dörd qolun qeydə alındığı matçda qalib müəyyənləşməyib.
Xatırladaq ki, Azərbaycan millisi ilk matçında Gürcüstana 2:3 hesabıyla uduzmuşdu. Gürcülər bu gün qrupun digər matçında Bosniya və Herseqovinanı da 2:1 hesabıyla məğlub ediblər. Bu nəticələrdən sonra millimizin qrupdan çıxmaq şansı demək olar ki, qalmayıb. Azərbaycan yığması qrupdan çıxmaq üçün son turda Bosniya və Herseqovinaya böyük hesabla qalib gəlməlidir. Ən vacib olan isə ispanların Gürcüstanla oyundan xalsız ayrılmasıdır. Əks halda komandamız qrupda qalacaq.
Avropa çempionatı
26 yanvar
İspaniya – Azərbaycan 2:2
Qol: R.Qomes, 11:28. Losano, 30:01 – Losano, 9:16-öz qapısına. İ.Atayev, 16:38.
Hakimlər: Migel Kastilyo (Portuqaliya), Qabor Kovaç (Macarıstan), Petar Radoyçiç (Serbiya).
Timekeeper: Qriqori Oşomkov (Estoniya).
Qroningen, Martini Plaza.
İspaniya: 12. Didak Plana, 2. Ortiz (k), 6. Raul Qomes, 9. Losano, 13. Mellado, 1. Xesus Herrero, 3. Borxa, 4. Esteban, 5. Boyis, 7. Kamaço Peres, 10. Sesilio, 11. Çino, 14. Raul Kampos.
Məşqçi: Fede Vidal.
Azərbaycan: 1. Emin Kürdov, 6. Eduardo Borges, 5. Fineo De Arauxo, 9. Rafael Vilela 2. Felipinyo, 3. Bolinya, 10. Vassura, 8. Rizvan Fərzəliyev (k), 7. Ramiz Çovdarov, 11. Xətai Bağırov, 17. İsa Atayev, 14. Hadi Ahmadi.
Baş məşqçi: Joze Alesio Da Silva.
Xal durumu: Gürcüstan – 6, İspaniya – 4, Azərbaycan – 1, Bosniya və Herseqovina – 0.
