Futbol üzrə Azərbaycan millisinin yarımmüdafiəçisi Ozan Can Kökçü Niderlandın “Eyndhoven” komandasında növbəti matçına çıxıb.
Arena.az xəbər verir ki, 25 yaşlı futbolçu Niderland Birinci Divizionunun 21-ci turundan təxirə salınmış “Roda” ilə oyunun iştirakçısı olub.
“Eyndhoven” səfərdə baş tutan bu oyundan məğlubiyyətlə ayrılıb – 0:3.
Ozan Can bu görüşə start heyətdə başlayıb və sonadək oynayıb. Cari mövsümdə 7 qol vurub, 2 məhsuldar ötürmə müəllifi olmuş Kökçü bu dəfə fərqlənə bilməyib. O, yalnız 61-ci dəqiqədə aldığı sarı vərəqə ilə diqqət mərkəzinə düşüb.
“Eyndhoven” cari mövsümdə qazandığı 30 xalla 20 kollektiv arasında 12-ci pillədə qərarlaşıb.
Xatırladaq ki, Ozan Can Kökçü “Eyndhoven”ə 2022-ci ilin yayında “Telstar”dan gəlib. Yarımmüdafiəçi daha öncə “Valveyk” və “Girəsunspor” komandalarının, həmçinin “Sabah”ın da uğurları üçün çalışıb. Ozan Azərbaycanın U-20 və U-21 yığmalarının da formasını geyinib, 2022-ci ildən isə əsas milliyə dəvət alır. O, “Eyndhoven”də bütövlükdə 61 oyuna çıxıb, 13 qola imza atıb, 2 məhsuldar ötürmə ilə yadda qalıb.
