UEFA Cim Retklifə məxsus İngiltərənin “Mançester Yunayted” və Fransanın “Nitsa” klublarının idarəetmə strukturlarında araşdırmalar aparacaq.
Arena.az bu barədə “The Athletic” nəşrinə istinadən məlumat verir.
Mənbənin məlumatına görə, bir neçə kluba sahiblik UEFA daxilində qızğın müzakirə mövzusudur. Ötən həftə bu məsələ ilə bağlı Nyonda təşkilatın prezidenti Aleksandr Çeferinin iştirakı ilə görüş keçirilib. Növbəti Çempionlar Liqası mövsümü başlamazdan əvvəl idmani dürüstlük qaydaları ilə bağlı danışıqlar aparılacaq. Hər iki komandası turnirə vəsiqə qazanarsa, Cim Retkliff “tənzimləyiciləri qane etməli olacaq”.
Xatırladaq ki, Cim Retkliff “Mançester Yunayted”də 25% pay müqabilində Qleyzer ailəsinin bacılı-qardaşlı 6 üzvünə 824 milyon avro məbləğ ödəmişdi. Bundan əlavə, Retklifin, başında durduğu INEOS şirkəti “Old Trafford”da gələcək sərmayə üçün nəzərdə tutulmuş əlavə 270 milyon avro ödənişi təmin edəcək.
Həmçinin sövdələşmənin bir hissəsi olaraq, INEOS klubun futbol əməliyyatlarını idarə etmək üçün məsuliyyəti ötürmək haqda idarə heyətinin tələbini qəbul edib. Buraya kişi və qadın futbolunun bütün baxışları və akademiyaları, həmçinin “Mançester Yunayted” PLC idarə heyətində və klubun idarə heyətində iki yer daxildir.
