Futbol üzrə Azərbaycan millisinin müdafiəçisi Cəlal Hüseynov Bolqarıstanın “Arda” komandasında növbəti matçına çıxıb.
Arena.az xəbər verir ki, 21 yaşlı müdafiəçi Bolqarıstan çempionatının 2023/2024 mövsümünün 34-cü turu çərçivəsində baş tutan ÇSKA 1948 (Sofiya) ilə oyunun iştirakçısı olub.
“Arda” doğma meydanda baş tutan bu qarşılaşmadan xal itkisi ilə ayrılıb – 0:0.
Hüseynov bu görüşə start heyətdə başlasa da, 61-ci dəqiqədə əvəzlənib. Məşqçilər heyəti mərkəz müdafiəçisi olan Cəlalın xidmətindən bu qarşılaşmada da dayaq yarımmüdafiəçisi kimi istifadə ediblər.
“Arda” bu heç-heçədən sonra Avropa Konfrans Liqasına vəsiqə uğrunda qrupda 45 xalla 2-ci, 16 iştirakçı arasında isə 8-ci pillədə qərarlaşıb. Cəlalın komandası Avropa Konfrans Liqasına vəsiqə qazanmaq üçün dörd iştirakçıdan ibarət bu qrupda birinci (7-ci) yeri tutmalıdır. Hazırda bu qrupa məhz ÇSKA 1948 komandası liderlik edir. Bolqarıstan çempionatında mövsümün başa çatmasına isə 2 tur qalıb.
Xatırladaq ki, Cəlal Hüseynov Bolqarıstan təmsilçisi ilə 2023-cü ilin iyun ayında 3 illik müqavilə imzalayıb. “Arda” onu “Zirə”dən transfer edib. Azərbaycanlı futbolçu bu komandada 32 rəsmi oyuna çıxıb, 1 qol vurub.
