Azərbaycan millisinin yarımmüdafiəçisi Emil Mustafayevin formasını geyindiyi Ukraynanın “Polesye” komandası bu gün növbəti matçına çıxıb.
Arena.az xəbər verir ki, sözügedən komanda Ukrayna çempionatının (Premyer Liqa) 2024/2025 mövsümünün 17-ci turu çərçivəsində Donetsk “Şaxtyor”u ilə qarşılaşıb.
“Polesye” bu rəqibini xalsız yola salıb. Meydan sahibləri yekunda 1:0 hesablı qələbəyə seviniblər.
Mustafayev bu görüşün iştirakçısı olmayıb. O, sonadək ehtiyatda qalıb.
Qeyd edək ki, bu, “Polesye”nin Ukrayna Premyer Liqasının 2024/2025-ci illər mövsümündəki 7-ci qələbəsidir. Futbolçumuzun komandası qalan oyunlarda 6 heç-heçə edib, 4 məğlubiyyətə üzülüb. 31 xal toplamış “Polesye” Premyer Liqanın turnir cədvəlində 16 iştirakçı arasında 5-ci yerdə qərarlaşıb.
Xatırladaq ki, Emil Mustafayev Ukraynanın digər klubu “Aleksandriya”nın yetirməsidir. Hücumameyilli yarımmüdafiəçi 2023-cü ilin iyul ayında azad agent kimi “Polesye”yə keçib. 22 yaşlı futbolçu indiyə qədər bu komandanın heyətində 33 oyuna çıxıb, 3 qol vurub, 5 məhsuldar ötürmə verib.
Vaxtilə Azərbaycanın U-21 yığmasında 3 oyun keçirmiş Mustafayev 2024-cü ilin mart ayında əsas millimizdə də debüt edib. Yarımmüdafiəçi Azərbaycan millisinin heyətində 5 oyuna çıxsa da, fərqlənə bilməyib.
