Futbol üzrə Azərbaycan milli komandası ilə Sumqayıtda yoxlama oyunu keçirəcək Haiti millisinin ölkəmizə gələcək heyəti müəyyənləşib.
Arena.az xəbər verir ki, baş məşqçi Sebastyen Minye 24 futbolçuya dəvət göndərib.
Heyətdə Fransa, Türkiyə, Yunanıstan, Niderland, Danimarka, Belçika, İtaliya, Portuqaliya, ABŞ, Ekvador, Albaniya, Yamayka və Litva çempionatlarında oynayan futbolçular yer alıblar. Ümumiyyətlə, Peterson Pyer-Luis istisna olmaqla, bütün futbolçular Haitidən kənarda çıxış edirlər.
Bu heyətdə Peterson Pyer-Luis, Vilquen Poqan, Teo Mişel, Emerson Less və Ruben Providens debütantdır. Yaxınlarda ölkəmizdə səfərdə olmuş Mayami “İnter”inin argentinalı kapitanı Lionel Messi, ispaniyalı yarımmüdafiəçisi Serxio Buskets və uruqvaylı hücumçusu Luis Suaresin komanda yoldaşı Fafa Piko da Azərbaycana gələcək. Əsl adı Fabris olan 34 yaşlı ABŞ doğumlu hücumçu bu il azad agent kimi prezidenti ingilis Devid Bekhemin, baş məşqçisi argentinalı Xavyer Maskeranonun olduğu “İnter Mayami”yə keçib.
Qapıçılar: Qarison İnosent (“Riteryay”, Litva), Jona Mednar (“Veyk Forest Yuniversiti”, ABŞ), Aleksandr Pyer (“Soşo-Monbelyar”, Fransa);
Müdafiəçilər: Karlens Arküs (“Anje”, Fransa), Martin Eksperiens (“Nansi Loren”, Fransa), Dük Lakroa (“Kolorado Sprinqs Svitçbəks”, ABŞ), Rikardo Ade (LDU, Ekvador), Jan-Kevin Düvern (“Kortreyk”, Belçika), Peterson Pyer-Luis (“Real Houp” Futbol Akademiyası), Fransua Düliss (“Eqnatiya”, Albaniya), Vilquen Poqan (“Sankt Pölten”, Avstriya);
Yarımmüdafiəçilər: Karl Fred Sante (“Feniks Rayzinq”, ABŞ), Denli Jan Jak (“Filadelfiya Yunion”, ABŞ), Leverton Pyer, Teo Mişel (hər ikisi “Şatoru”, Fransa), Kristofer Atis (“Lekko 1912”, İtaliya), Emerson Less (“Maunt Plezent” Futbol Akademiyası, Yamayka);
Hücumçular: Dükkens Nazon (“Kayserispor”, Türkiyə), Frontdi Pyero (AEK, Yunanıstan), Mondi Prunye (“Frank Boran”, Belçika), Fafa Piko (“İnter”, ABŞ), Dani Jan (“Toreense”, Portuqaliya), Ruben Providens (“Almere Siti”, Niderland), Luisius Don Didson (“Oense”, Danimarka).
Qeyd edək ki, Haiti yığmasının Azərbaycan millisi ilə oyunu martın 22-də Mehdi Hüseynzadə adına Sumqayıt şəhər stadionunda baş tutacaq. Oyuna saat 21:45-də start veriləcək.
