“Sabah”ın baş məşqçisi Murad Musayev klub telekanalına müsahibəsində Avstriyada davam edən təlim-məşq toplanışını dəyərləndirib.
Arena.az xəbər verir ki, rusiyalı mütəxəssis əvvəlcə bunları söyləyib:
“Burada komanda üçün gözəl şərait yaradılıb. Hava şəraiti, meydanların durumu yüksək səviyyədədir. Üstəlik, güclü rəqiblərlə yoxlama oyunu keçirdik. Futbolçuların bu toplanışa yanaşmasından da çox razıyam. Onlar məşqlərdə inamlı təsir bağışlayırlar. Addım-addım öz ideal formalarını bərpa edirlər. Komanda daxilində müsbət əhval-ruhiyyə var”.
Musayev keçirdikləri yoxlama oyunları ilə bağlı da fikrilərini bildirib: “Qəbələ” ilə oyunun ilk 20 dəqiqəsində çox yaxşı təsir bağışladıq. “Əl-Sədd”lə görüşdə isə artıq 45 dəqiqə yaxşı oyun göstərə bildik. Bugünkü (“Sankt Pauli” ilə dünənki oyunu nəzərdə tutur – red.) oyuna gəldikdə isə, komanda mənfi nəticə əldə etsə də, 90 dəqiqə taktiki cəhətdən eyni tempdə oynamağı bacardı və döyüşkən futbol sərgilədi. Addım-addım irəliləyirik. İndi nəticə yox, oyunçuların keyfiyyət və fiziki hazırlıq baxımından inkişaf etməsi daha mühümdür. Komandada sürətli inkişaf var”.
“Bizi xoş hisslər gözləyir”
Baş məşqçi yeni transferlər haqda da danışıb: “Yeni futbolçuların komandaya, komanda yoldaşlarına, məşqçilərə uyğunlaşması üçün müəyyən qədər vaxt lazımdır. Bu prosesə səbrlə yanaşmalıyıq. Rəhman Daşdəmirov toplanışın ilk günündən bizimlədir. Sofian Çakla isə komandaya bir qədər gec qoşuldu. Buna baxmayaraq, artıq yaxşı formadadır. Çünki evdən hazır formada gəlmişdi. Uyğunlaşmaq üçün ona çox az vaxt lazım oldu. Artıq bütün oyunlarda ilk dəqiqələrdən meydanda olur. Jarl Marqaritanın yüngül zədə ilə gəlib. Bir müddət fərdi məşq etdi. Tezliklə məşqlərə qoşula biləcək. Vensan Till isə komandaya hamıdan gec qoşuldu. Lakin onun hazırlığı da yaxşıdır. Optimal formasını bərpa etməyə çox yaxındır. Şadam ki, bu futbolçular bizimlədir. Mən məhz bu oyunçuları komandamda görmək istəyirdim. Əminəm ki, onlar bizi daha da gücləndirəcək”.
Murad Musayev sonda azarkeşlərə səslənib: “Son mövsümdə yaxşı nəticəyə imza atdıq. Təkcə qazanılan xallar yox, həmçinin göstərilən oyunla da azarkeşlərimizi sevindirdik. Öz növbəsində onlar da daim bizi irəli səslədilər. Müxtəlif performanslarla, hazırladıqları bannerlərlə öz dəstəklərini göstərdilər. Ev və səfər oyunlarımızda daim bizimlə idilər. Onları yenə sevindirməyə çalışacağıq. Bizi qarşıda çətin və maraqlı mövsüm gözləyir. Hansı ki, bura avrokubok matçları da daxildir. İnanıram ki, həm biz, həm də azarkeşlərimiz daha da yaxşı olacağıq. Ümid edirəm ki, bizi xoş hisslər gözləyir”.
