Futbol üzrə Azərbaycan millisinin yarımmüdafiəçisi Ozan Can Kökçü Niderlandın “Eyndhoven” komandasında növbəti matçına çıxıb.
Arena.az xəbər verir ki, 25 yaşlı futbolçunun komandası Niderland Birinci Divizionunun 8-ci turu çərçivəsində baş tutan “Dordrext”lə oyunun iştirakçısı olub.
“Eyndhoven” doğma meydanda baş tutan bu oyundan 1 xalla ayrılıb. Hesabı qonaq komanda açsa da, futbolçumuzun komandası bu dəfə də 90+4-cü dəqiqədə bərabərlik qolunu vurmağı bacarıb.
Ozan Can bu görüşə start heyətdə başlayıb və sonadək mübarizə aparıb. Cari mövsümdə 1 qol vurmuş futbolçu bu dəfə fərqlənə bilməyib.
“Eyndhoven” cari mövsümdə qazandığı 11 xalla 20 kollektiv arasında 9-cu pillədə qərarlaşıb. Komandanın ehtiyatda təxirə salınmış bir oyunu da var.
Xatırladaq ki, Ozan Can Kökçü “Eyndhoven”ə 2022-ci ilin yayında “Telstar”dan gəlib. Yarımmüdafiəçi daha öncə “Valveyk” və “Girəsunspor” komandalarının, həmçinin “Sabah”ın da uğurları üçün çalışıb. Ozan Azərbaycanın U-20 və U-21 yığmalarının da formasını geyinib, 2022-ci ildən isə əsas milliyə dəvət alır. O, “Eyndhoven”də bütövlükdə 45 oyuna çıxıb, 8 qola imza atıb.
