Futbol üzrə Azərbaycan milli komandasının yarımmüdafiəçisi Ozan Can Kökçü Niderlandın “Eyndhoven” komandasında növbəti matçına çıxıb. Arena.az xəbər verir ki, 23 yaşlı futbolçu Niderland kubokunun 1/32 final mərhələsi çərçivəsində baş tutan “Villem II” ilə görüşün iştirakçısı olub.
Futbolçumuzun komandası bu rəqiblə doğma meydanda qarşılaşıb. “Eyndhoven” meydanı 1:0 hesablı qələbə ilə tərk edib. Nəticədə sözügedən kollektiv kubokda 1/16 finala vəsiqə qazanıb.
Ozan Can Kökçü bu görüşə start heyətdə başlayıb və 86-cı dəqiqədə əvəzlənib. Komandasının yeganə qolunu da millimizin futbolçusu vurub. O, 2-ci dəqiqədə fərqlənməklə yekun nəticəni müəyyənləşdirib. Xatırladaq ki, Ozan bu mövsüm Niderland Birinci Divizionunda da 4 qola imza atıb.
Ozan “Eyndhoven”ə bu yay “Telstar”dan gəlib. Yarımmüdafiəçi daha öncə “Valveyk” və “Girəsunspor” komandalarının, həmçinin “Sabah”ın da uğurları üçün çalışıb. Ozan Azərbaycanın U-20 və U-21 yığmalarının da formasını geyinib.
