Avropa Liqasının qrup mərhələsinin 4-cü turunun “Qarabağ” – “Bayer” oyununun biletləri sabahdan etibarən satışa çıxarılacaq.
Arena.az xəbər verir ki, bu barədə Ağdam klubunun mətbuat xidməti məlumat yayıb.
Xəbərdə bildirilir ki, bu qarşılaşmanın biletləri sabah saat 12:00-dan etibarən iticket.az-da satışda olacaq.
Tofiq Bəhramov adına Respublika stadionunda keçiriləcək matçın biletlərinin qiyməti müvafiq olaraq 5, 20, 40 və 100 manat təşkil edir.
VVIP C və VVIP D sektorlara bilet alaraq, “VIP Lounge” üstünlüklərindən yararlanmaq istəyən azarkeşlər üçün biletlərin qiyməti isə 200 manatdır.
Satış məntəqələri:
- Iticket.az-ın satış məntəqələri (iticket.az-da onlayn satış);
- “Qarabağ”ın “Park Bulvar”dakı fan-şopu;
- Tofiq Bəhramov adına Respublika stadionunun kassaları;
“Changan Azerbaijan”da isə VVIP, VIP və CAT 1 biletlər satılacaq.
Xatırladaq ki, “Qarabağ” – “Bayer” oyunu noyabrın 9-da Bakıdakı Tofiq Bəhramov adına Respublika stadionunda keçirilcək. Oyuna saat 21:45-də start veriləcək.
Avroliqanın qrup mərhələsinin H qrupunda yer almış bu komandaların ilk oyunu isə bu gün Leverkuzendə baş tutacaq. 3-cü tur çərçivəsində keçiriləcək səfər matçına Bakı vaxtı ilə saat 23:00-da start veriləcək.
Geridə qalmış 2 turdan sonra həm “Bayer”in, həm də “Qarabağ”ın 6 xalı var. Almaniya təmsilçisi daha yaxşı top fərqinə görə ilk pillədə qərarlaşıb.
H qrupunda bu iki komandadan başqa Norveçin “Molde” və İsveçin “Hakken” klubları da mübarizə aparır. Lakin bu iki komanda hələ xal hesabını aça bilməyib.
