Çempionlar Liqasının 1-ci təsnifat mərhələsinin “Qarabağ”la “Linkoln” arasındakı cavab oyunu öncəsi mətbuat konfransları baş tutacaq.
Arena.az xəbər verir ki, bu barədə Ağdam klubunun mətbuat xidməti məlumat yayıb.
Xəbərdə bildirilir ki, cavab oyunundan öncə Bakıda təşkil ediləcək mətbuat konfransları və media nümayəndələri üçün açıq məşqərin vaxtı məlum olub.
Belə ki, Ağdam komandasının baş məşqçisi Qurban Qurbanovun mətbuat konfransı iyulun 18-də Bakı Olimpiya Stadionunda baş tutacaq. Tədbirə saat 17:40-da start veriləcək. 17:55-də isə media nümayəndələri üçün açıq məşq (ilk 15 dəqiqə) keçiriləcək.
Qonaq komandanın baş məşqçisi Xavi Munyosun mətbuat konfransı isə 19:00-da Bakı Olimpiya Stadionunda reallaşacaq. Cəbəllüttariq çempionunun açıq məşqi isə 19:15-də başlayacaq.
Xatırladaq ki, “Qarabağ” “Linkoln”la Cəbəllüttariqdə baş tutan ilk oyundan 2:1 hesablı qələbə ilə ayrılıb. Cavab matçı isə ayın 19-da Bakı Olimpiya Stadionunda baş tutacaq. Oyuna saat 20:00-da start veriləcək.
