Son iki mövsümü “Turan Tovuz”da keçirmiş qapıçı Tərlan Əhmədli bundan sonra “Araz-Naxçıvan”ın uğurları üçün çalışacaq.
Arena.az xəbər verir ki, bu barədə Naxçıvan klubu rəsmi saytı vasitəsilə məlumat yayıb.
Xəbərdə bildirilir ki, heyətini gücləndirmək istiqamətində çalışmalarını davam etdirən “Araz-Naxçıvan” Tərlan Əhmədli ilə müqavilə imzalayıb. 1 illik anlaşmaya imza atan 29 yaşlı qapıçı yeni mövsümün sonuna qədər bu komandada çıxış edəcək.
Xatırladaq ki, “Araz-Naxçıvan” dünən “Qəbələ”dən Ürfan Abbasov və Ülvü İsgəndərovu, həmçinin “Neftçi”dən Ömər Buludovu da heyətinə cəlb etmişdi. Onlarla da 1 illik müqavilə imzalanıb.
Tərlan Əhmədli 2022-ci ilin iyul ayından “Turan Tovuz”da çıxış edirdi. O, geridə qalmış 2023/2024 mövsümündə cəmi 3 oyunda forma geyinib. Tərlanın “Turan Tovuz” karyerası bütövlükdə 32 oyun, 40 buraxılmış qol və 12 “quru” matçdan ibarətdir. Əhmədli vaxtilə “Sabah”, “Xəzər Bakı”, “Sumqayıt” və “Qəbələ”nin də formasını geyinib.
