Futbol üzrə Azərbaycan milli komandasının sol cinah müdafiəçisi Toral Bayramov “Bursaspor”un heyətində növbəti oyununa çıxıb.
Arena.az xəbər verir ki, Bursa təmsilçisi Türkiyə Birinci Liqasının 2026/2027-ci illər mövsümünün 3-cü turu çərçivəsində “Karagümrük”lə qarşılaşıb.
Sözügedən komanda bu rəqiblə səfərdə üz-üzə gəlib. Oyun “Bursaspor”un 1:2 hesablı məğlubiyyəti ilə başa çatıb. Toral matça start heyətdə başlayıb və fasilədə – hesab 0:2 olarkən əvəzlənib. O, 17-ci dəqiqədə kobud oyuna görə sarı vərəqə də alıb. Bu, Toralın “Bursaspor”da 3-cü rəsmi oyunu olub.
Yeni mövsümdə ilk məğlubiyyətini almış “Bursaspor” hazırda 6 xalla 3-cü pillədə qərarlaşıb.
Xatırladaq ki, Toral Bayramov bu ilin iyun ayında “Qarabağ”dan “Bursaspor”a keçib. Müdafiəçinin Türkiyə klubu ilə 2029-cu ilin 30 iyununa qədər müqaviləsi mövcuddur.
2020-ci ildən “Qarabağ”ın əsas komandasında çıxış edən Toral Bayramov bu müddətdə 254 oyunda 37 qol vurub, 46 məhsuldar ötürmə verib. O, komanda ilə 5 dəfə Azərbaycan çempionu olub, 2 dəfə Azərbaycan Kubokunu qazanıb.
Bayramov 2021-ci ildə debüt etdiyi Azərbaycan millisinin heyətində meydana çıxdığı 40 oyunda 5 qola imza atıb, 3 məhsular ötürmə verib. Toral əvvəllər U-19 və U-21 yığmalarımızın da formasını geyinib.
